Issittumi ineriartortitsineq Putinip sukkatsisarniaraa
Ruslandip præsidentia Vladimir Putin, præsidentip ilisimatusarnermut ilinniartitaanermullu siunnersuisoqatigiivisa Kremlimi ippassaq sisamanngornermi ataatsimiinneranni taama ilaatigut oqarpoq. Nutaarsiassaqartitsivik RIA Novosti taama allaaserisaqarpoq.
- Teknologiimik siunissamut atorneqarluarsinnaasumik toqqammaviliisariaqarpugut, aningaasarsiorneq taamaalinikkut nukittorsarneqarsinnaaniassammat, suliffeqarfiillu nunarsuup sinneranut unammillersinnaassuseqarsinnaaniassapput.
- Peqqinnissaqarfik pitsaanerusoq nunaateqarnerlu imminut akilersinnaassusilik aamma pilersittariaqarparput. Nunallu immikkoortui aningaasarsiornikkut sukkanerusumik ineriartortittariaqarpavut, Ruslandip Issittortaa kangisinnerpaartaalu matumani ilaatinneqartariaqarlutik, Putin, Kremlimi ataatsimiinnermi oqarpoq.
Suliniutit qulaani pineqartut piviusunngussappata ilisimatuussutsikkut suliffiit, oqartussat suliffeqarfiillu namminersortut suleqatigiinnerusariaqartut, præsidentip aamma oqaatigaa.
