Søren Gade Folketingimi siulittaasuugallartunngortoq

Søren Gade (V) siulittaasuugallartussatut novembarip allaqqaataani qinersereernermi Folketingimi ullumi marlunngornermi ataatsiminnermi siullermi toqqarneqarpoq.

Folketingimi sivisunerpaamik ilaasortaq, Pia Kjærsgaard (DF), Folketingimi ullumi marlunngornermi ataatsimiinnermi siullermi aqutsisuuvoq, taassumalu Søren Gade Venstremeersoq oqaluttarfimmukaqquaa.

- Siulittaasuugallartunngortitaanera qujassutigaara tamaanilu sulinissatsinnut tamassi tikilluaqquassi, Søren Gade oqarpoq.

Taanna Folketingimi ilaasortani amerlanerussuteqartunit, tassa Socialdemokratinit, Venstremit, Moderatinit, SF-imit, Danmarksdemokratinit, Liberal Alliancemit, De Konservativenit, De Radialenit DF-imillu, toqqarneqarpoq.

Søren Gade Folketingimi aqagu pingasunngornermi siulittaasunnguissangatinneqarpoq. Folketingillu ataatsimiititaliassaanik aamma aqagu pingasunngornermi pilersitsisoqassasoq naatsorsuutigineqarpoq.

AAMMA ATUARUK Folketingimi amerlanerussuteqartut siulittaasussatut innersuussamut tapersersuisut

Søren Gade siulittaasunngortussanngortoq sapaatit akunnerata naanerani erserpoq. Taanna Folketingimut qinigassanngortikkusulluni Europa-Parlamentimi aasaq ilaasortaajunnaarpoq.

Socialdemokratit Søren Gade taperseraat, ministeriugallartoq Mette Frederiksen (S) nalunaarpoq. Gade siulittaasussatut piukkullugu, Venstrep siulittaasuata Jakob Ellemann-Jensenip nalunaarutigeriitsiaraalu taamaaliorpoq.

Søren Gade siulittaasussatut amerlanerussuteqartunit piukkussaasoq arfininngormat erserpoq. Tamanna tuikkut pattalaartinnertut tigugini, Gade oqarpoq.

- Naggaarneqarsinnaanngitsunik inuunermi pisoqartarpoq. Siulittaasussatullu piukkussaanera taakkununnga ilaavoq. Siulittaasunngussagumalu nersorneqaatitut tigussavara, Søren Gade oqarpoq.

Søren Gade Anders Fogh Rasmussenip Lars Løkke Rasmusenillu ministeriunerunerini 2004-miit 2010-p tungaanut illersornissamut ministeriuvoq.