Folketingimi amerlanerussuteqartut siulittaasussatut innersuussamut tapersersuisut
![](/sites/default/files/styles/image_934x467/public/article_images/20221112-132803-a-1920x1349we.jpg?itok=Cli0vLfa)
Venstrep Søren Gade siulittaasussatut piukkullugu arfininngornermi ualikkut nalunaarutigaa. Socialdemokratit siulittaasuata, ministeriunerugallartup Mette Frederiksenip tamanna tapersersorlugu kinguninngua nalunaarutigaa:
- Venstrep Søren Gade Folketingimi siulittaasussatut piukkuppaa. Tamanna isumaqarpunga isumassarsiatsialaasoq, ministeriunerugallartoq allappoq.
Venstrep siulittaasua Jakob Ellemann-Jensen ima oqarpoq:
- Folketingimi tatigineqartorujussuuvoq, ilaasortallu akornanni misilittagartuujulluni. Pikkorilluinnartumik piukkussaqartugut, Folketingimillu ataatsimoortitsisinnaasumik piukkussaqartugut isumaqarpunga, Jakob Ellemann-Jensen oqarpoq.
Nye Borgerlige, Moderaterne, Socialistisk Folkeparti De Radikalellu Søren Gade siulittaasussatut piukkullugu aamma nalunaaruiginikuuaat.
Folketingimilu amerlanerussuteqartut Søren Gadep Folketingimut siulittaasunngornissaa taamaasillutik tapersersorpaat.
Søren Gade Folketingimut siullerpaamik 1999-imi qinigaavoq. Qinikkatut sulinermini ilaatigut illersornissamut ministeriusimavoq, naalagaaffiullu kukkunersiuisuatut aamma sulisimalluni.
EU-Parlamentimi 2019-imili ilaasortaavoq. Folketingimut novembarip aallaqqaataani qinigaaqqikkami EU-Parlamentimi ilaasortaajunnaassaaq.
Folketingimut qinersisoqareeraangat, Folketingimut ilaasortat siulittaasussamik nutaamik qinersisussaapput. Inatsimmi tunngaviusumi tamanna allassimavoq.
Folketingip siulittaasortaava sapaatit-akunnerata tulliani pisortatigoortumik qinerneqartussaavoq.
Folketingip siulittaasoqarfiani siulittaasup tulliatut sisamat aamma qinerneqartussaapput. Partiit annerit sisamat siulittaasuutitaqanngitsut akornannit taakku ilaasortaassapput.