Sumiginnaasoqarneranut iliuusissatut pilersaarut nutaaq kommuninit isornartorsiorneqartoq
Meeqqat inuusuttullu sumiginnarneqartarnerisa annikillisinnissaanut iliuusissamik pilersaarusiortoqarnissaa Inatsisartut ukiaq aalajangerpaat.
Pilersaarutip misinngiutertaa Naalakkersuisut manna tusarniaassutigaat, missingiulli kommuninit qassiiusunit isornartorsiorneqarpoq.
Iliuusissatut pilersaarut ilaqutariinnut inuuniarnermikkut ajornartorsiuteqartunut ilaqutariinnullu tamanut assigiinngitsunik neqerooruteqarnissamut sammisoq, isumaginninnermut inatsiseqarnermullu naalakkersuisoqarfik ilisimatitsivoq.
Pilersaarutip atugarliornerpaat tappiilliorfigigai
Kommuneqarfik Sermersuumi Meqqanut Ilaqutariinnullu ataatsimiititaliami siulittaasup pilersaarut ilorrisimaarutiginngivippaa. Taassuma pilersaarut ilaqutariit inuuniarnermikkut ajornartorsiuteqartunut allannguinavianngissoraa.
- Neqeroorutit ilaat ilaqutariit isumalluutigissaartut pingaarnermik iluaqutigissavaat. Neqeroorutit ilaqutariinnut inuuniarnikkut ajornartorsiuteqartunut aaqqissuussat amigaataapput, Uju Petersen oqarpoq.
AAMMA ATUARUK Meeqqanut sumiginnakkanut iliuusissatut pilersaarusiornissaq akuersissutigineqartoq
Ataatsimiititaliami siulittaasup peqqinnissamut susassaqarfik ilaqutariinnut sullissiviup suliassaanut naalakkersuisoqarfimmit ilaatinniarneqarnera assersuutigaa.
Ilaqutariinnut sullissivik kommunit ataanniippoq, kommunillu tamarmik immikkut suliassat suut aaqqiissuteqarfigineqassanersut aalajangertarpaat:
- Ajorluinnarpoq. Kommunit namminneq aalajangiisinnaatitaanerannik piiaaneruvoq minnerunngitsumillu ilaqutariinnut sullissiviit meeqqanut ilaqutariinnullu sanngiinnerpaanut neqeroorutaallutik, tamanut neqeroorutaanngillat, Uju Petersen oqarpoq.
AAMMA ATUARUK Meeqqat pilersaarusiornermi peqataatinneqartariaqarput
Kommune Kujalliup iliuusissatut pilersaarut aamma isornartorsiorpaa. Iliuusissatut pilersaarummi iliuusissaq aalajangersimasoq amigaataalluinnartoq kommuni isumaqarpoq. Pilersaarummi ajornartorsiutaasut ilisimaneqareersut annermik nassuiaatigineqartut kommunip oqaatigaa.
Meeqqanut Inuusuttunullu immikkoortortaqarfimmi pisortap, Nielsine Petersenip pilersaarut piviusorsiornerulissappat suliniutit allat assersuutigalugu peqqinnissaqarfik Naalakkersuisunit ilanngunneqartariaqartut nalilerpaa.
Ilinniakkat amigaataasut
Sermersuumi ataatsimiititaliap siulittaasuata iliuusissamik pilersaarusiortoqarnerani kommunit peqataatinneqarnerat naammanngissoraa:
- Pilersaarusiortoqarnerani ataasiarluni workshopertitsisoqarpoq ullormilu ataatsimi isumasioqatigiissitsisoqarluni taakkunani immikkoortut qitiusut oqallisigineqanngillat, Uju Petersen oqarpoq.
Iliuusissatut pilersaarummi isumaginnittunik ilinniartitsinissamut pilersaaruteqannginnera isornartorsiorneqartut ilagaat.
Kommuneqarfik Sermersuumit oqaatigineqartoq naapertorlugu meeqqat inuusuttullu sumiginnarneqartarnerisa ajornartorsiutaanerannut tamanna pingaaruteqarpoq.
