Meeqqat Illersuisuat, Aviâja Egede Lynge.

MIO: Meeqqat pilersaarusiornermi peqataatinneqartariaqarput

Meeqqat sumiginnakkat pillugit nuna tamakkerlugu pilersaarusiornermut meeqqat peqataatinneqassapput. Meeqqat pisinnaatitaaffiinut sullissivimmeersut taama isumaqarput.

Meeqqat illersorneqarnissamut ineriartornissamullu pisinnaatitaaffii nunatsinni naammassineqanngillat. Taamaammat meeqqat sumiginnakkat pillugit nuna tamakkerlugu pilersaarusiornermi meeqqat peqataatinneqartariaqarput. Meeqqat pisinnaatitaaffiinut sullissivimmeersut taama isumaqarput.

- Illersorneqarnissamut, ikiorserneqarnissamut ineriartornissamullu pisinnaatitaaffiit annilaarnartumik unammilligassaqarfiupput, Meeqqat Illersuisuat Aviâja Egede Lynge meeqqat nuna tamakkerlugu pilersaarusiamut inassutaat pillugit nalunaarusiami nutaami allappoq.

Meeqqat isummersortinneqartut

MIO-p nalunaarusiaani meeqqat 295-it isummersuutaat ilaatigut najoqqutarineqarput. Tassa meeqqat pitsaanerusumik inuuneqarnissaasa qanoq qulakkeerneqarsinnaanerannik siunnersuuteqarput.

AAMMA ATUARUK - Vi kan ikke se, at I har gjort noget ved vores vilkår

AAMMA ATUARUK Nunatsinni inuit pisinnaatitaaffii pitsanngorsagassaasut

Meeqqallu pillugit aalajangiisoqartussaatillugu, soorlu assersuutigalugu angerlarsimaffinni, paaqqinnittarfinni politikkimilu, peqataatinneqarnissartik kissaatigaat:

- Piviusut malillugit meeqqat atugarisaannik paasinninnissamut tapertaasinnaagamik aaqqiissutissanillu nassaarsinnaallutik, Meeqqat Illersuisuat allappoq, nangillunilu:

- Nikikkiartuaarluni ingerlatsineq aqqutigalugu inerisarneqassaaq, meeqqat inuusuttullu isumaqarluartumik peqataatillugit, ingerlatsinerit inersimasunit ilusilersorneqartussanngorlugit suliat aqqutiginagit, MIO allappoq.

Pisortat suleqatigiittariaqartut

Meeqqat apersorneqartut akissutaanni sammisat qaqinneqartut assigiinngitsuupput; ilaqutariinni toqqissisimaneq, nakuusertarneq, kinguaassiutitigut kannguttaatsuliorneq, ineriartorneq, ilinniagaqarneq, peqqissuseq sunngiffimmilu susassaqartitsineq qaqinneqarput.

MIO naapertorlugu Naalagaaffiit Peqatigiit Meeqqat pillugit isumaqatigiissuutaanni artikelit nunatsinni eqquutsinneqanngitsut:

 

NP-artikeli 3: Meeqqat soqutigisaasa ilaatinnissaasa qulakkeernissaat.

 

NP-artikeli 5: Angajoqqaat akisussaaffii.

 

NP-artikeli 6: Meeqqat inuunissaminnut pisinnaatitaaffiat.

 

NP-artikeli 7: Meeqqap nalunaar­sorneqarnissamut ateqarnissamullu pisinnaatitaaffia.

 

NP-artikeli 9: Meeqqap, angajoqqaamMinit avissaartitaanngin­nissamut pisinnaatitaaffia, meeqqamut pitsaanerpaaq eqqarsaatigalugu tamanna pinngippat.

 

NP-artikeli 12: Meeqqamut tunngasutigut tamatigut meeqqap tusaaneqarnissaminut pisinnaatitaaffia.

 

NP-Artikeli 18: Pisortat naapertuuttumik angajoqqaanut angajoqqaatullu akisussaatitaasunut naapertuuttumik ikiuinissaminnut pisussaaffiat.

 

NP-artikeli 19: Timikkut tarnikkullu naakuuserfigineqan­nginnissamut naalliutsin­neqannginnissamullu illersorneqarnissaminut meeqqap pisinnaa­titaaffia

 

NP-artikeli 20: Angajoqqaaqanngitsut ikiorneqarnissaminnut pisinnaatitaaffiat naalagaaffiit peqataasut (pisortat) meeqqanik angajoqqaaqanngitsunik ikiuissapput.

 

NP-artikeli 24: Meeqqap qaffasinner­paamik anguneqarsin­naasumik peqqissuu­nissaanut pisinnaa­titaaffeqarnera.

 

NP-artikeli 25: Naalagaaffiit peqataasut (pisortat) meeqqat ulloq unnuarlu angerlarsimaffinni inissin­neqarsimasut naafferar­tumik nakkutigineqar­nissaat qulakkiigas­saraat.

 

NP-artikeli 26: Inuuniarnikkut ernumanaatsumik inissisima­nissaq: Meeraq pisinnaati­taaffeqarpoq inuuniar­nikkut ernumananngit­sumik inissisimanis­saminik.

 

NP-artikeli 27: Meeraq pisinnaati­taaffeqarpoq inuunerminiima inissisimassalluni allaat meeqqap ineriar­tornissaa qulakkeerne­qarsinnaassalluni.

 

NP-artikeli 28: Meeqqap atuartinne­qarnissaminut ilinnia­gaqarnissaminullu pisinnaatitaaffia.

 

NP-artikeli 29: Meeqqap ineriar­tortuarnissaminut pisinnaatitaaffia.

 

NP-artikeli 30: Meeqqat ikinnerussute­qartuneersut sumiuussu­sertillu aallaavigalugu kulturiminnik namminnerlu oqaatsiminnik atuinissa­minnut pisinnaati­taaffeqarnerat.

 

NP-artikeli 31: Meeqqap sunngiffe­qarnissaminut, eqqis­sisimaarsinnaanissaminut pinnguarnissa­minullu pisinnaa­titaaffia.

 

NP-artikeli 33: Hashimik imigas­samillu atornerluiner­mut tunngatillugu meeqqap illersor­neqarnissaminut pisinnaatitaaffia.

 

NP-artikeli 34: Kinguaassiutitigut kanngutsaatsuliorfi­gineqarnissamut ator­nerlugaanissamullu meeqqap illersorne­qarnissaminut pisinnaatitaaffia.

 

NP-artikeli 39: Meeqqap ikiorneqarnissaminut pisinnaatitaaffia naalagaaffiit peqataasut (pisortat) meeqqat ikiorne­qarsinnaanissaannut pisussaatitaaffiat.

Tassa taakkartorneqartut oqartussat, pisortat namminersortullu akisussaaffiisa ataanniipput, tamannalu isumaqarpoq suliassaqarfiit assigiinngitsut akimorlugit suleqatigiittoqartariaqartoq, MIO allappoq.

AAMMA ATUARUK Meeqqat inuusuttullu najukkaminni ikiorneqarnerusariaqarput

AAMMA ATUARUK Meeqqanut sumiginnakkanut iliuusissatut pilersaarusiornissaq akuersissutigineqartoq

Pisortallu meeqqat pillugit ataatsimoorussamik anguniagaqarlutik suleqatigiilerpata, pisortat allanngoraangata anguniakkat allanngorannginnissaat qulakkeerneqassasoq, meeqqat pisinnaatitaaffii pillugit sullissivik nalunaarusiami allappoq.

- Nuna tamakkerlugu iliuusissanik pilersaarut tassaaginnassanngilaq siunertat kusanartut tulleriaarlugit allassimaffiat, kisiannili Meeqqat pillugit Isumaqatigiissummi aalajangersakkanut naleqqiullugu anguniakkanik piviusunik anguneqarsinnaasunillu imaqassalluni, MIO nalunaarusiamini allappoq.

Akisusinnaanera apeqqutaassanngitsoq

Naalagaaffiit peqatigiit meeqqat pillugit isumaqatigiissutaanni 54-iusuni 19-it nunatsinni malinneqanngillat. Suliassaqaqimmallu akisusinnaaqisoq, Aviâja Egede Lyngep nassuerutigaa.

- Akisussaaq, aap, kisianni isumaqarpunga utaqqiinnarsinnaanngitsugut, meeqqat illersuisuat oqarpoq.

Meeqqanut sumiginnakkanut iliuusissatut pilersaarusiaq Inatsisartunut ukiakkut ataatsimiinneranni saqqummiunneqassaaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat