Nakuusamut ilaasortaq politikerinut: - Sulerisimanersusi takusinnaanngilarput

Politikerit NAKUUSA-p kaammattuutaasa saqqummiunnerannut qisuariarnertik pillugu sakkortuumik isornartorsiorneqarput.

- Uanga meeqqatut assigiinngissutinik takusaqarsinnaanngilanga. Aningaasarpassuarnik atuisugut oqarussi, taava sulerisimanersusi takusinnaanngilara. Pitsaanerulersitsinngilasi, NAKUUSA-mi ilaasortaq, Nivi Rosing KNR-imut oqarpoq.

Politikerit meeqqat inuusuttullu atugaannik pitsanngorsaanissamut qanoq iliornissaannut kaammattuutitik NAKUUSA-mit saqqummiunneqareersullu taama oqarpoq. Meeqqat inuusuttullu politikerinit pingaartinneqarnerusariaqartut saqqummiinermi ilaatigut oqaatigineqarpoq.

AAMMA ATUARUK Peqqinnissaq inuunerissaarnerlu Meeqqat Isummersorfiisa ukkataritikkusukkaat

Taamali oqarneq ingammik kommunini politikerinit akerlilerneqarpoq. Kommuneqarfik Sermersuup borgmesteria, Asii Chemnitz Narup, taakkununnga ilaavoq.

- Tassami demokratiip isumavia unaammat, isummatsinnik paarlaateqatigiittarnerit, taamaammat erseqqissumik oqarfigivakka isumaqatiginagit oqarmata, nunatsinni suliniuteqartoqanngivissortoq. Taamaanngilaq, Asii Chemnitz Narup KNR-imut oqarpoq.

Aamma Kommune Qeqertalimmi borgmesteri, Ane Hansen, akerliliivoq. Meeqqat inuusuttullu Kommune Qeqertalimmi aningaasaliiffigineqarnerpaajusut Ane Hansen oqalugiarnermini akerliliilluni oqarpoq.

- Aamma suna tamaat iiginnarsinnaannginnatsigu, Ane Hansen oqarpoq.

AAMMA ATUARUK Nakuusa Ilulissani ataatsimeersuartitsisoq

Taamali oqarnerat Nivi Rosingip naammaginngilaa.

- Ajornartorsiutit taasatta aaqqiivigineqarnissaannut aningaasartuuteqartupilussuullutik, iliuuseqartupilussuusimallutik oqarput. Aningaasalli taama amerlatigisut atorsimagussigit, oqaannarussilu taanna misilereersimallugu, taava sooq assigiinngissutsimik takusaqarsinnaanngitsugut? Nivi Rosing aperaaq.

NAKUUSA pissuteqarluni pilersinneqartoq, taassuma eqqaasitsissutigaa, tassalu meeqqat inuusuttullu qanoq atorfissaqartitsinersut meeqqanit inuusuttuniillu paasititsinissaq.

- Aningaasartuuteqartupilussuusugut oqaannarpusi. Sapinngisarsi tamaat iliuuseqarniarsimallusi oqarussi aningaasat kukkusumik atorsimassavasi, Nivi Rosing oqarpoq.

AAMMA ATUARUK Isumaginninnikkut sullissineq pitsanngorsarneqassaaq

Aningaasat qanoq atorneqassanersut pillugu oqallinneq pissanganartuusoq borgmesterit marluk isumaqarput.

Kaammattuutillu ilaat aallaavigalugit iliuuseqarnissaq politikerinit soqutigineqarpoq. Unnuariaqarneq Kommuneqarfik Sermersersuumi misissorneqassasoq, Asii Chemnitz Narup oqarpoq.

- Nuummi taamaattoqarpoq, taavalu kommunerujussuup sinneranut siammarternissaat pillugu oqariartormata, taanna angerlaatissavara, Asii Chemnitz Narup oqarpoq.

Meeqqat inuusuttullu pillugit sulineq pitsaanerusariaqartoq kommunimit nassuerutigineqarsimasoq aamma oqarpoq. Tamatumalu pitsaanerulersinnissaanut qanoq ikioqatigiilluartoqarsinnaanersoq paasiniarpaa.

AAMMA ATUARUK Løn til frivillige er ikke en løsning

- Maluginiarpara kaammattuutigimmassuk, nammineq kajumissuseq tunngavigalugu suliniaqataallutik suliniaqatigiiffiit qaninnerusumik suleqatigeqqullugit. Tassunga atatillugu inuusuttut uku isumaqatigivakka, taamaammat uagut maani marsip 30-ani isumasioqatigiititsissaagut, meeqqanik sammisunik nammineq kajumissutsimik suliniaqatigiiffiit oqaloqatigisussaagatsigit, Asii Chemnitz Narup oqarpoq.

Aamma Ane Hansen kaammattuutigineqartuni ingerlataqaqqissinnaasoraaq.

- Saqqummiussaanni atugaqarsinnaavugut. Meeqqat susassaqarnissaannut tunngasut, meeqqat aamma isumassorneqarnerunissaannut tunngasut, soorlu angajoqqaat erngunneranni inuunerlunnerannilu. Taakkua iliuuseqarfiginissaat soorunami pilerinartupilussuupput, Ane Hansen oqarpoq.

NAKUUSA-meersullu borgmesterinit nersualaarneqarput. Asii Chemnitz Narupilu oqaloqatigeeqqinnissamik kissaateqarpoq.

- Oqaloqatigeqqikkusuppakka. Pikkunartupilussuupput, Asii Chemnitz Narup oqarpoq.