Ataatsimiititaliami siulittaasoq: Kajumissutsimik suliaqartut akissarsisalernissaat aaqqiissutaanngilaq

Angajoqqaat imigassartortillugit meeqqat sumiginnarneqalersarput. Namminneq kajumissutsiminnik suleqataarusuttut kommunip akuleruffigerusunnagit allatigulli ikiorsinnaagai isumaginninnermut suliffeqarnermullu ataatsimiititaliami siulittaasoq oqarpoq.

- Ukua suliniaqatigiiffiit nammineq ingerlasut qulaallugit naalakkersornavianngilagut. Kisianna tamatta inuiaqatigiittut una ajornartorsiut akisussaaffigaarput soorunami peqataassaagut kivitseqataanissatsinnut, Charlotte Ludvigsen oqarpoq.

Kajumissutsiminnik suliaqartunut Unnuarissanut aningaasanik immikkoortitsisoqartariaqartoq Inuit Ataqatigiinneersoq Peter Olsen isumaqarpoq. Angerlarsimaffimmi eqqissiviilliortoqartillugu arfinilerarterutaat meerartaqarfiusartoq politiit nalunaarsugaanni paasinarsimmat Inuit Ataqatigiinnit Inatsisartuni ilaasortaq siunnersiusiussalluni siunniuppaa.

AAMMA ATUARUK IA-p Unnuarissat akissarsitittalerusukkaat

Unnuarissanulli suleqataarusuttunik naammattunik pissarsinissaq ullumikkut ajornakusoorpoq, taamaattoqarneralu akissarsititsisoqartalerneranik aaqqinneqarsinnaasoq Peter Olsen isumaqarpoq.

Meeqqanut sumiginnarneqartunut suliniutit amerlanerunissaat Peter Olsenip parteeqataata Charlotte Ludvigsenip isumaqatigaa, akissarsititsisalernissarli isumaqatiginagu.

Unnuarissanulli suleqataajumasunik naammattunik pissarsinissaq ajornavissappat Peter Olsenip isumassarsiaa aqqutissatut kingullertut aaqqiissutaasinnaanerarpaa.

- Ajornavissappat illoqarfinni allani Unnuarissanik peqalernissaa soorunami Peter Olsenip siunnersuutaa atorluarneqarsinnaavoq. Taamaaliornikkut kajumisitsisoqalersinnaammat, Charlotte Ludvigsen oqarpoq.