IA-p Unnuarissat akissarsitittalerusukkaat

Kajumissutsiminnik suleqataarusuttunik aqqusinermi qaammammut ataasiarluni angalaaqataasartussanik pissarsinissaq maanna ajornakusoorpoq. Taakkualu akissarsitinneqartalernerisigut suleqataarusuttoqalernissaa ajornannginnerulersinnaasoq Peter Olsen isumaqarpoq.

- Nammineerlutik piumassutsiminnik ingerlatsisut utaqqiinnarsinnaajunnaarpagut. Taamatut utaqqeruusaaginnarluta meerartagut asuli sumiginnarsinnaannginnatsigit, Inuit Ataqatigiinni Inatsisartuni ilaasortaq Peter Olsen oqarpoq.

Angerlarsimaffimmi eqqissiviilliortoqartillugu arfinilerarterutaat meerartaqarfiusartoq politiit nalunaarsorsimavaat. Angajoqqaalli imigassartorsimatillugit meeqqat sumiginnarneqartarnerat takornartaanngilaq. Taammaammat kajumissutsiminnik aqqusinermi angalaartartut pisariaqartinneqarnerat annertuvoq.

- Kajumissutsiminnik suleqataarusuttunik pissarsinissaq ajornakusoortarpoq, suleqataasimasullu ilaat aallarnikuullutik. Ingerlatiinnarnissaa unammillernarsinnaasarpoq, Unnuarissat Nuummi siulittaasuat Niels Nielsen oqarpoq.

AAMMA ATUARUK Grønlandsbanken Unnuarissallu suleqatigiilersut

Tamanna pissutissaqarluarpoq.

- Tusartarpara inuit unnuarianngornissaq ersigilaartaraat, tassami sanilivit meeraa imaluunniit illooqqavit meerai naapissinnaagakkit, taavalu ilaatigut nipangiussisussaatitaaffik pineqaleraangat akunnattoortitsisarluni, Niels Nielsen oqarpoq.

Pisariaqartinneqaqimmatalu aningaasarsisalernissaannut aningaasanik immikkoortitsisoqartariaqartoq Peter Olsen isumaqarpoq.

- Namminneq piumassutsiminnik ingerlajunnaarlutik kisianni pisortatigoortumik immaqa aningaasarsiaqarlutik ingerlalissapput.

Nuummi kajumissutsiminnik suleqataasut 40-t nalunaarsorneqarsimapput, taakkunanngalu 15-iinnaat aqqusinermi angalaaqataasarlutik.