Grønlandsbanken Unnuarissallu suleqatigiilersut

Corporate Social Reponsibility - CSR tunngavigalugu isumaqatigiissuteqarnikkut - suliffeqarfik ilaatigut Unnuarissat ininik toqqorsivinnillu atugassaqartissavai. Tamatuma saniatigut Nuummi Sisimiunilu sulisorineqartut Unnuarissanut ilanngunnissaannik aamma periarfissinneqarput.

Grønlandsbanken taamaaliornikkut isumaginninnikkut akisussaaqataanerminik takutitserusuttoq, Unnuarissat tusagassiorfinnut nalunaaruteqarlutik taama allagaqarput.

- GrønlandsBANKEN-imit taamatut tapersersorneqalernerput nuannaarutigeqaarput, taamaaliortoqarneratigummi Nuummi Sisimiunilu meeqqat inuusuttullu toqqissisimanarnerusumik atugassaqartinnissaannik suliniuteqarnerput ingerlatiinnarsinnaavarput, aamma suliffeqarfiit allat Unnuarissanik tapersersuerusussinnaanissaat neriuutigaarput, Niels Nielsen, Nuummi Unnuarissat siulittaasut oqarpoq.

Unnuarissat tassaapput inersimasut akisussaassuseqarlutik nammineq kajumissutsiminnik suliniuteqartut, tamat ornittagaanni meeqqat inuusuttullu pinerullugit angalaartartut.