Peqqinnissaq inuunerissaarnerlu Meeqqat Isummersorfiisa ukkataritikkusukkaat

Toqqissisimasumik angerlarsimaffeqarlunilu katersuuffeqarnissaq, timikkullu tarnikkullu peqqinnerunissaq meeqqat kaammattuutigisaasa ilagaat.
Det er desværre langt fra alle børn, der er så glade som disse.
Ukiormanna meeqqat ataatsimeersuarnerinni Naalagaaffiit Peqatigiit nunarsuarmi piujuaannartitsinissamut siunniussaat sammivaat, tassani immikkoortuni anguniagaq 3, Peqqinnissaq Inuunerissaarnerlu sammineqarluni. Assi © : Børnepanelet
Allattoq Bikki P. Kleist
marsip 19-at 2019 09:07

Nakuusammi kommunini Meeqqat Isummersorfii sisamaasut Ilulissani januaarimi ataatsimeersuarneranni aalajangersakkat ullumi saqqummiunneqartussanngorput - meeqqallu ersarissunik oqariartuuteqartut, Nakuusami suliniummik aqutsisoq, Najaaraq Møller oqarpoq.

- Avatangiisiminnut toqqissisimanissaq pingaartinnerpaavaat. Inersimasuulluni taanna tupinnalaartorujussuuvoq meeqqat taamatut eqqummaarinnerat takuneqarsinnaammat. Inersimasunut kaammattuuteqarlutik anersaakkut timikkullu peqqillutik perornissaminnut, Nakuusami suliniummik aqutsisoq Najaaraq Møller taama oqarpoq.

AAMMA ATUARUK Nakuusa Ilulissani ataatsimeersuartitsisoq

Inersimasullu eqqarsariaqqinnissaat pingaaruteqartoq, Nakuusamit suliniuteqartoq oqarpoq.

- Pissutigalugu massakkut meerartatsinnut tunniussagut avatangiiserititagut taavalu immaqa inatsisitigut politikkikkut sukaterinissaq pisariaqalersimarpasippoq, tassami meeqqat piumasarivaat toqqissisimanissaq. Uagullu inuusuttut meerartagullu tusaaniarnissaannut pisussaaffilernerusariaqalerluta, Najaaraq Møller oqarpoq.

AAMMA ATUARUK Nakuusa kinguaassiutitigut atornerluisarneq akiorniarlugu suliniummik saqqummersitsisoq

Meeqqat ataatsimeersuartinneqarnerannit kaammattuutit siornatigut tusaatissatut politikerinit tiguneqartarput - kaammattuutillu massakkut pimoorunneqarnissaat neriuutigineqarpoq.

- Taamaattumik massakkut neriuutigaarput taamaattoqassanngitsoq taavalu suliniutit, sualuppoq kommunini, ingerlanneqassasut. Taavalu taassuma kingunerisaanik una aalajangersagaq allanneqarmat aamma tamanut naalakkersuisuninngaanniit kommuninut aamma nassiussorlugu taavalu qaaqqusilluta uani ullormi meeqqat tunniutissagaat taanna aalajangersagaq, Nakuusami suliniummik aqutsisoq, Najaaraq Møller taama oqarpoq.

Aalajangersakkat meeqqanit politikerinut Kommuneqarfik Sermersuup ataatsimiittarfiani ullaaq manna nalunaaqutaq quliniit ulloqeqqanut qiteqqunnissaata tungaanut tunniunneqassapput.