Nunatsinni inuit pisinnaatitaaffii pitsanngorsagassaasut
![](/sites/default/files/styles/image_934x467/public/article_images/mennesker_inuit_foto_namminersolrutik_oqartussat_tusagassiiviat_audience_greenland_national_day.jpg?itok=O1BW7fCp)
Inuit pisinnaatitaaffiinut instituti aamma Kalaallit Nunaanni Inuit pisinnaatitaaffii pillugit Siunnersuisoqatigiit killiffissiuinerminni nalunaarusiaat siulleq tassaavoq Kalaallit Nunaanni assigiinngissitsineq.
Tassa suiaassuseq, inuiannit kikkunneersuuneq, kinaassuseq, utoqqaassuseq upperisarlu pillugit assigiinngissitsisarnerit.
Taakkulu aallaavigalugit nunatsinni suli assigiinngissitsisoqartaqisoq, nalunaarusiami atuarneqarsinnaavoq.
Pinaveersaartitsinissamik suliaqartariaqartut
Taamaammat Naalakkersuisut assigiinngissitaanissamut illersuutaasussamik inatsisissatut siunnersuusiussasut, nalunaarusiortut siunnersuutigat.
Attaveqaqatigiittarfikkut qinngarsuisarnerit nalunaarusiami tassani ilaatigut aamma sammineqarpoq.
AAMMA ATUARUK Assigiimmik akissarsiaqarnermut isumaqatigiissut akuersissutigineqartoq
Naalakkersuisut qinngarsuilluni oqaaseqartarnerit akiorniarlugit pinaveersaartitsinissamik pilersaarummik suliaqassasut, taakku aamma siunnersuutigaat.
Meeqqat inuusuttullu pisinnaatitaaffiisa nunatsinni atuutsinneqarniarnerat aamma nalunaarusiarineqarpoq.
Isumaginninnikkut kiffartuussineq ukiuni kingullerni ineriartoraluartoq, suli suliassaqaqaaq.
Ilisimasat allannguivinnissamut pingaartuusut
Nalunaarusiortut allapput, naak ajornartorsiutit politikkikkut eqqumaffigineqarlutik nassuerutigineqaraluartut, oqartussaasut akisussaasut sumiginnaaneq, persuttaasarneq innarliisarnerlu pinaveersimatinniarlugit pisariaqartumik ikorfartuinissamut sernissuinissamullu unammilligassaqaqisut.
AAMMA ATUARUK Meeqqat isumaginninnermi suliani najorteqarsinnaatitaassapput
AAMMA ATUARUK Meeqqanut inuusuttunullu qimarnguiviliortoqarnissaa siunnersuutigineqartoq
Taamaammat ataatsimut isigalugu erseqqissarpaat, oqartussat ajornartorsiutit pineqartut qanoq naammattuukulaneqartiginerannik paasissutissanik amerlanerusunik katersillutik tamanut saqqummiussissasut.
Pissutsinut ajornartorsiutillu ineriartornerannut ilisimasat aaqqissuulluakkat allannguivinnissamut pingaartuusut, nalunaarusiami allassimavoq.
Innarluutillit pisinnaatitaaffii aamma nalunaarusiarineqarpoq.
Inuit timikkut tarnikkullu innarluutillit nunatsinniit aallararnerannut ornikkuminaatsitaqarneq, inuussutissarsiutissaaleqineq aamma ilinniarnermi atortussaaleqineq peqqutaasutut nalunaarusiami tikkuarpaat.
AAMMA ATUARUK Nunatsinni innarluutillit atugaat kommuninit arlalinnit isornartorsiorneqarput
Taamaammat oqartussaasut ajornartorsiutit tamakkua pitsanngorsaavigisariaqarpaat piviusunngortinniarneqarnerilu nakkutigisariaqarpaat.