Meeqqanut inuusuttunullu qimarnguiviliortoqarnissaa siunnersuutigineqartoq
Siunnersuuteqartullu suliniummut ukiuni tulliuttuni sisamani 6 milliuunit koruunit immikkoortinneqarnissaat siunnersuutigaa.
Siunnersuulli Isumaginninnermut Naalakkersuisumit Martha Abelsenimit (S) itigartitsissutigineqarpoq.
Naalakkersuisup akissutigaa, akisussaaffik kommuuniniillunilu siunissamut ungasinnerusumut aaqqiissutaasinnaanngitsoq.
Tamanna meeqqat pillugit siunnersuisoqatigiit siulittaasuata Aviâja Egede Lyngep ilalerpaa aappaatigooqartillugulu.
- Akisussaaffik kommuunimiinnersoq Namminersorlutilluunnit Oqartussaniinnersoq meeqqat eqqarsaatigineq ajorpaat, meeqqalli soqutigisaat tassaavoq maannakkorpiaq ikiorserneqarnissartik sumunnarfissaqarnissartillu, Aviâja Egede Lynge taama oqarpoq.
AAMMA ATUARUK Meeqqanut Immikkoortortaqarfik MIO-p akissarsiaritittagaanik tunineqartoq
Ajornartorsiutip aallaavia tunngavigisariaqarparput aamma meeqqat ilaqutariillu pillugit siunissamut ungasissumut isigaluta aaqqiissummik suliaqarnissaq pisariaqarpoq, Martha Abelsen ilaatigut taama akissuteqarpoq - tamanna pillugu Aviâja Egede Lyngemit ilalerneqarpoq.
- Ungasissoq eqqarsaatigissavarput kisianni aamma maassakkut ikiorneqarnisssamik pisariaqartitsisut ikiorneqartariaqarput, tamannalu meeqqat pisinnaatitaaffigaat, kommuuniuppata, naalakkersuisuuppata inersimasulluunnit meeqqat tusaasariaqarpaat, kisianni maannakkoqqissaaq meeqqat pisariaqartitsisut puigussanngilavut, Meeqqat pillugit siunnersuisoqatigiit siulittaasuat Aviâja Egede Lynge taama oqarpoq.
Kujataani meeqqat inuusuttuaqqallu orniguffigisinnaasaannik amigaateqarnerummata kujataani isumassuivimmik aallartitsisoqarsinnaagaluartoq, Aviâja Egede Lynge oqarpoq.
