Nunatsinni innarluutillit atugaat kommuninit arlalinnit isornartorsiorneqarput
Inuit Pisinnaatitaaffiinut Instituttip, Nunatsinni innarluutillit atugarisaat sakkortuumik isornartorsioreerpaat, avannaanilu kommunit marluk ajornartorsiut ilisimarisinnaagaat sapaatip akunnerata siuliani oqaluttuaraarput.
AAMMA ATUARUK Isornartorsiuineq kommunenit paasineqartoq
Qeqqata Kommuniani Ilaqutariinnermut Isumaginninnermullu Ataatsimiititaliami Siulittaasup Inuit
Pisinnaatitaaffiinut Instituttip Nunatsinni innarluutillit atugarisaat pillugit isornartorsiutaat ilisarisinnaalluarpai.
-Aap ilisarnaput, imalu nangippoq.
-Innarluutilinnut tunngatillugu ilinniarsimasut amigaataajuaannarput, ilisimaneqarnerilu annikitsuararsuulluni, Hans Frederik Olsen oqarpoq.
Qeqqata kommuniani ajornartorsiut ilisarineqareersoq Kommuni kujallermi aammaarluni ilisarineqarpoq.
1. Ilinniarfinni innarluutilinnut sullissisinnaasut amigaatigineqarneri.
2. Innarluuteqarneq pissutigalugu assigiinngisitsisoqartillugu (diskrimination) illersuutaasinnaalluartunik peqannginnera
3. Angallannikkut periarfissalunnerat.
4. Nunatsinni innarluutilinnut tunngasunik paasissutissanik ilisimasanillu amigaateqarnera uparuarneqarpoq.
-Ilaana ilisarnaqaat, Kommune Kujallermi Isumaginninnermut Ataatsimiititaliami siulittaasoq Mari S. Abelsen oqarpoq.
Taassumalu ilaatigut oqaatigaa innarluutilinnut sullissisinnaasunik ilinniarsimasunik amigaateqartoqartoq.
-Kommune Kujallermi aamma ajornartorsiutigivarput imaluunniit unamminartoqartipparput, inuit ilinniarsimasut ingammik innarluutilinnik suliaqartut, Mari S. Abelsen oqarpoq.
Innarluutillit pillugit inatsisissap Inatsisartut upernaamut ataatsimiinnissaanni saqqummiunneqassasoq, Isumaginninnermut Naalakkersuisup Martha Abelsenip KNR-imut siusinnerusukkut oqaatigaa.
