Isornartorsiuineq kommunenit paasineqartoq
Innarluutillit atugarisaasa isornartorsiorneqarnerat Avannaata Kommuneani Ilaqutareeqarnermut Ataatsimiititaliami siulittaasup ilisiarisinnaavaa.
-Aap taamaappoq, unali pingaarnerpaavoq akisussaaffimmik tigusinissarput. Erseqqissumik taanna oqaatigigutsigu taava iliuuseqarnissamut immitsinnut pisussaaffilissuugut, Jens Immanuelsen oqarpoq.
Nunatsinni annertuumik innarluutilittut 2017-imi nalunaarsorsimasut katillugit 1542-pput, taakkunannga amerlanerpaartai tassa 604-it Qaasuitsup Kommunerisimasaaninngaanneerlutik.
Kommune Qeqertalimmi innarluutilinnut atugassarititaasut qulaajarneqartut Ataatsimiititaliami INUIT-mi siulittaasoq oqarpoq.
- Qulaajaanerit ingerlanneqarput, innarluutillit atugaat ulluinnarni qanoq ippat, taavalu aamma pingaartipparput najugaqatigiiffiit innarluutillit najugaqatigiiffii aamma atugassarititaasut taakkununnga qanoq innersut qulaajassallugit, Aqqa Samuelsen oqarpoq.
Inuttut pisinnaatitaaffiit pillugit instituttip isornartorsiutai Kommune Qeqertalimmiit aamma ilisarineqarsinnaallutillu paasineqarsinnaapput.
-Ilisarnarput aamma paasilluarneqarsinnaapput aamma takornartaanngillat pissutsit taamaannerat inuit innarluutillit atugaat eqqarsaatigalugit, Aqqa Samuelsen oqarpoq.
Innarluutilinnut tunngasut piffissami qanittumi kommunet peqatigalugit suliarineqassasut, aammalu Inatsisartut upernaaru ataatsimiinnissaanni innarluutilinnut inatsit oqaluuserineqassasoq, Isumaginninnermut Naalakkersuisup Martha Abelsenip KNR-imut ippassaq aamma oqaatigaa.
Inuttut pisinnaatitaaffiit pillugit instituttip, Nunatsinni innarluutillit atugarisaat isornartorsioqqammerpaat, ilaatigut tikkuarlugit innarluutillit angallannikkut periarfissalunnerat taamaammallu angerlarsimaffimminniit anisarnerat killeqartoq.
