Assigiimmik akissarsiaqarnermut isumaqatigiissut akuersissutigineqartoq
![](/sites/default/files/styles/image_934x467/public/article_images/img_2231.jpg?itok=_S-hF_5K)
Kalaallit Nunaata sumiiffimmi atuutsitsinnginnerminik atorunnaarsitsinermigut Naalagaaffiit Peqatigiit suliffeqarnermut tunngasunut suliniaqatigiiffiata ILO-p tunngaviusumik isumaqatigiissutaanik C100-mik taaguuteqartumik, angutit arnallu assigiimmik naleqartumik sulineranni assigiimmik akissarsiaqartitsisarnermut maanna ilaalerpoq. Sumiiffimmi atuutsitsinnginnerup nassatarisaanik isumaqatigiissut Kalaallit Nunaanni maannamut atuussimanngilaq. Atuutilersitsinerlu Suliffeqarnermut naalakkersuisup Erik Jensenip nuannaarutigaa:
- Nalunaarutip uuma annertuup nunatsinni atuutilersinneqarnera isumaqarpunga naalakkersuisuninngaanniit nuannaarutigisariaqaripput. Taassumami qulakkeeramiuk nunatsinni suiaassuseq apeqqutaatinnagu assigiimmik akissarsiaqarsinnaanermut qulakkeerinninniarneq, taamaattumik taanna nunarsuarmioqatitsinnut ersarissumik pitsaasumillu kiinnernerusoq isumaqarpugut naalakkersuisuninngaanniit, Aatsitassanut suliffeqarnermullu naalakkersuisoq Erik Jensen taama oqarpoq.
Isumaqatigiissutip tunngavii naammassinnereerput
Danmarkip ukiut ingerlanerani ILO-p isumaqatigiissutai 16-it Kalaallit Nunaannut atuuttussanngorlugit atuutilersippai, C100 taakkununnga ilaalluni, Kalaallit Nunaallu ullumikkut nammineerluni ILO-mut nalunaarusiortarpoq.
C100 ILO-mi nunat ilaasortat 187-it akornanni nunanit 173-ini atulersinneqarpoq. Kalaallit Nunaata naligiissitaaneq pillugu inatsisai ukiorpassuarni isumaqatigiissutip tunngaviinut naammassinnereerput.
- Tunngaviusumik pisortatigoortumik uuma atuutilersinneratigut nuannaarutigisorujussuuarput taama aalajangiisoqarnikuunera, taassumallu malitsinneqarnissaanut Kalaallit Nunaanniit tamakkiisumik qulakkeerinneqataanerput. Kisianni naalakkersuisuninngaanniit inatsisartullu aalajngiusimanerat aallaavigalugu assigiinngisitsisoqannginnissaani suliniarneq ingerlattuartarsimavarput, taamalilluta suiaassuseq apeqqutaatinnagu suliniutit ingerlattuartarsimallutigit, taamaattumik uuma pisortatigoortumik atuutilersinnera taamatullu suliniarnerit siornatigut ingerlasareersimammata tunngaviusumik allannguinngilaq, kisianni pisortatigoortunngornera nuannaarutigeqaarput, Aatsitassanut suliffeqarnermullu naalakkersuisoq Erik Jensen oqarpoq.
Kalaallit Nunaata ukiuni 2017-imit 2021-mut tunngaviusumik isumaqatigiissutit tallimat sinneruttut atortuulersissagai Inatsisartut 2015-imi upernaakkut ataatsimiinneranni aalajangerneqarpoq.