Ruslandimi eqqissiviilliortoqarunnaarsimanissaa Blinkenip qularigaa
USA-p nunanut allanut tunngasunut ministeriata, Antony Blinkenip, Ruslandimi eqqissiviilliortoqarunnaavissimanissaa takorlooruminaatsippaa.
Akilersillutik sakkutuut Wagner-gruppikkut Ruslandip illoqarfiisa pingaarnersaata Moskvap tungaanukanerat nunarsuarmi arfininngornermi malinnaaffigineqartupilussooreersoq sapaammi taama oqarpoq.
- Ruslandimi eqqissiviilliorunnaartoqarsorinngilara, nutaarsiassaqartitsivik Reuters naapertorlugu Blinken oqarpoq.
Akerleriinnerup kingunissai nalunartut
Wagner-gruppimit sakkutuut Ukrainemit Ruslandimukariarlutik arfininngormat Moskvap tungaanukalerput. Wagner-gruppip siuttuata Jevgenij Prigozjinip Ruslandillu illersornissamut ministereqarfiata akornanni akerleriinneq sakkortusimmat taama pisoqarpoq.
Prigozjinip russit illersornissaqarfiat Wagner-gruppimit sakkutuut sumiissusaannut qaartatumeerisimanerarpaa. Wagner-gruppi russillu sakkutuui iligiikkaluarput. Russit oqartussaasuisa qaartartumeerisimanerarneqarnertik ilumuunnginnerarpaat.
Prigozjinilli taassumalu sakkutuui saassussinertik arfininngormat unnukkut isumaqatigiissuteqareerlutik unitsippaat.
Wagner-gruppilli sakkutuui maannakkut sussanersut oqaatigeriissallugu siusippallaartoq, Blinken isumaqarpoq. Wagner-gruppimit sakkutuut russit sakkutuuinut ilanngukkunik eqqartuussissutigoortinneqarnavianngitsut, Ruslandimi nalunaarutigineqarpoq.
Pisut Ruslandip naalakkersuisuinut Ukrainemilu sorsunnermut qanoq sunniuteqassanersut pillugit isumaliutiginninnissaq siusippallaartoq, Blinkenip erseqqissaatigaa.
