Wagner-gruppi Ruslandimut saassussisoq: Moskvap tungaanukartut

Akilersillutik sakkutooqatigiit Wagner-gruppimeersut Ukrainemi sorsunnermi russinik ikiuuttut Rusland maanna akerlilersulerpaat.

Ruslandip sakkutuui Wagner-gruppip sakkutuuinut saassussisimasut, qaartartumeerisimasut toqutsisimasullu, Wagner-gruppip siuttuata Jevgenij Prigozjinip oqaatigaa.

Ruslandilli illersornissamut ministereqarfiata tamanna ilumuunnginnerarpaa.

Prigozjinip saassussinermik taasaminut akissuteqarluni Ruslandip sakkutooqarnermut siuttui tunuartinniarpai, Prigozjinilu naapertorlugu, Wagner-gruppip akilersillutik sakkutuui 25.000-it tamanna anguniarlugu toqunissaminnut piareersimapput.

Moskvap tungaanukartut

Wagner-gruppi unnuaq Ruslandimukarpoq. Akilersillutik sakkutooqatigiit Moskvamut aallarasaartut oqaatigineqarpoq.

Prigozjin naapertorlugu, Wagner-gruppimit sakkutuut Ruslandip ilaani Rostovimi nakkutlliiviit tamaasa tiguarpaat, russillu sakkutuuisa qulimiguuliutaannik nakkartitsereerlutik.

Ruslandip sakkutuui Wagner-gruppip biiliinut aqqusinermi Moskvamit kujammut 500 kilometerinik ungasitsigisumiittumi saassussisimasut ilisimannittoq nutaarsiassaqartitsivimmut Reutersimut ullaaq oqarpoq.

Wagner-gruppip biilii Ruslandip ilaanut Lipetskimut Moskvamit 400 kilometerit missaannik ungasitsigisumiittumut ullaaq killipput.

Tassalu Wagner-gruppi Moskvamut sukkasuumik qanilliartorpasippoq.

Tamanna killuussinerusoq, tamatumunngalu peqataasut tamarmik sakkortuumik pillarneqassasut, Ruslandip præsidentia Vladimir Putin oqarpoq.