Aalisariut ningittagarsuut nutaaq Masilik Tunup imartaani saarullinnik tinguttuunillu aasaq aalisareerluni Qaanaap eqqaani qaleralinnik maannakkut aalisaleruttorpoq. Asseq Tunumi assilisaavoq.Assi: Royal Greenland

Royal Greenland Qaanaap eqqaani misileraalluni aalisartitsisoq

Royal Greenlandip aalisariutaa ningittagarsuut nutaaq, Masilik, Tunup imartaani saarullinnik tinguttuunillu aasaq aalisareerluni Qaanaap eqqaani qaleralinnik maannakkut aalisaleruttorpoq.

Aalisariut ningittagarsuut Qaanaap eqqaani aalisarpoq, tamatumanilu sinerissap qanittuani avataasiorluni sikunissaata tungaanut aalisassaaq. Royal Greenland nittartartakkamini taama allaaserisaqarpoq.

Masilimmik piginnittup Ice Trawl Greenland A/S-ip siulersuisuni siulittaasup, Royal Greenland A/S-imilu siunnersortaanerup ilisimatitsissutigaa, umiarsuaatileqatigiiffik Qaanaap eqqaani misileraalluni aalisarnissamut akuersissumik qinnuteqarlunilu tunineqarsimasoq.

- Avanersuarmi aalisarnermik inuussutissarsiuteqarnerup ineriartortinneqarnissaa Naalakkersuisuisunit soqutigineqarmat Qaanaap eqqaani qaleralinnik misileraalluni aalisarnermik aallartitsinissatsinnut qinnuteqarlutalu akuersissummik pivugut. Masilik sinerissap qanittuani Qaanaap eqqaaniittumi aalisarnissamut akuersissummik taamatuttaaq sumiiffimmi Canadap killeqarfiata eqqaaniittumi avataasiorluni aalisarnissamut akuersissumik 2016-imi ukiaagaa pivoq, Ove Rosing Olsen Royal Greenlandimut taama oqarpoq.

Masilik aalajangersakkat eqquutsinneqartussat pinngitsoornani malinneqarnissaannik piumasaqaatitaqartumik Qaanaap eqqaani qaleralinnik misileraalluni aalisarnissamut akuersissummik pivoq.

Royal Greenland naapertorlugu, Masiliup Qaanaap eqqaani misileraalluni aalisarnini aggustip 24-anit aallartimmaguli sinerissap qanittuani aalisarnermi pisaqarlualaarpoq, ilimagineqarporli ukiap ingerlanerani pisaqarnerussasoq.

- Avataasiorluni aalisarnermi pisat annertusiartortarsimapput, tamatumanilu paasivarput iluanaaruteqarfiusinnaasoq, Ove Rosing Olsen Royal Greenlandimut taama oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat