Royal Greenland namminersortunngorsinnaavoq

Naalakkersuisut Siulittaasuata Naalakkersuisoqarfiani pisortap, Søren Hald Møllerip, Sermitsiamut nalunaarutigaa suleqatigiissitamik pilersitsinissamut suliakkerneqarsimalluni. Suliffeqarfissuup Namminersorlutik Oqartussanit pigineqartup namminersortunngorsarneqarnissaanut periarfissat kingunerisinnaasaalu taassuma misissoqqissaassavai. Sermitsiaq.AG taama allaaserisaqarpoq.

Aalisarneq pillugu ataatsimiititaliarsuaq pillugu oqaloqatigiinnermi sammisaq saqqummersinneqarpoq.

Naalakkersuisut marsip arfineq-pingajuanni ataatsimiinnerannit nalunaarut naapertorlugu ima aalajangiisoqarpoq: "Royal Greenlandip namminersortunngorsarneqarnera pillugu suliassaq ataatsimiititaliarsuup suliassaanit peerneqarpoq suliassaqarfimmillu oqartussaasumut inissinneqassalluni”.

Naalakkersuisut siulittaasuata naalakkersuisoqarfia tamanna pillugu oqartussaasunngorpoq. 

Sulisut 2.500-t missaanniittut Royal Greenlandimi sulipput, ukiunilu kingullerni suliffeqarfissuaq angusarissaarluni. 

Suliffeqarfiup 2017-imi sinneqartoorutai 129 millionit koruuniupput.