Royal Greenland misileraalluni inalugalinniarusuttoq
Aalisaammik saarullinniartilluta inalugalissuarmik pisaqaraangatta nuannaarutigivallaarneq ajorparput amerlanertigullu imaanut miloriutiinnartarlutigu, tunisassiaasinnaaneralu takorloorneq ajorlutigu.
Inalualissuilli sinerissatta imartaaniittut immaqa aningaasarsiutaalluarsinaasut, biologi Royal Greenlandimilu ineriartortitsinermut pisortaq Nikoline Ziemer oqaluttuarpoq.
- Nunatta imartaa inalugaleqassasoraara, taamaattumik Royal Greenland ukioq manna inalugalinniarnissamut qinnuteqassasoq inassutigaara, Nikoline Ziemer oqarpoq nangillunilu.
- Asiami mamartuliarineqarluartarput, Kinamilu akisoorujussuullutik, taanna oqarpoq.
Islandimi Canadamilu inalugalinnik niuerneq aallartilluariivissimavoq. Islandimi ukiumut 1.500 tonsit 3.000 tonsillu akornanni pisarineqartarnikuullutik siorna 6.000 tonsit angungajallugit pisarineqarput. Canadap kangiani suli amerlanernik pisaqartoqarpoq.
- Canadami inalugallit 4000 tonsit missaaniittut pisarineqartaraluartut, siorna 8000 tonsit tugaanut pisarineqarput. Taamaattumik pisarpassuupput, Nikoline Ziemer oqarpoq.
Nunatsinni sumi inalugalinniarneq pitsanerussanersoq ilisimaneqangilaq. Kisianni Royal Greenland raajarniutaatertik Sermilik atorlugu Nuup eqqaani, Sisimiut eqqaani Qeqertarsuullu tunuani inalugalinniarnissamut qinnuteqarpoq.
Aalisarnerit tamarmik sinerissap qanittuani ingerlanneqassapput, pisallu amerlassusaat tunisassiarissallugit soqutiginassappata, inalugallit nunatsinni tunisassiarineqassapput.
- Qeqertarsuarmi tunisassiorfeqarfitsinni tunisassiarisalerusuppagut, Nikoline Ziemer oqarpoq.
Inalugallit tunisasiarinissaat pisariitsunnguusoq, taanna nassuiaavoq. Tassalu taliusai piiginnangassaapput, taamaalingaanni aamma erlavii namminneq katattaramik.
Jens Napaattooq paragraf 37 naapertorlugu apeqquteqaammini aalisarnermut Naalakkersuisumit Nikkulaat Jeremiassenimit akissutisivoq, misileraalluni inalugalinniarneq ukioq manna ingerlanneqassasoq ingerlatseqatigiiffiillu marluk qinnuteqarsimasut.
KNR Aalisarnermut naalakkersuisoqarfimmut attaveqarpoq, taakkualu paasissutissiipput Royal Greenlandip qinnuteqaataa suli piareerneqanngitsoq qinnuteqartullu aappaata atia oqaatigisinnaanagu.
