Royal Greenland aningaasaqarnermut pisortartaassaaq
Inummik allamik Royal Greenlandip pisortaqarfianut ukiumi nutami isertoqassaaq. Aningaaasaqarnermummi pisortaq Niels Duus Kinnerup ukiuni 17-ini tassaneereerluni januaarip aallaqqaataani 2025-mi taamaatissalluni aalajangerpoq.
Tamanna Royal Greenlandip qullersami amerlanerusut nunatsinniinnisaannik siunertaqarnerata malitsigisarigaa, piginneqatigiiffik tusagassiutinut allappoq - "tamannalu Nils inuttut atukkani peqqutigalugit siunertamut matumunnga peqataasinnaanngilaq".
- Nilsip aningaasaqarnikkut ineriartornermut sinneqartooruteqartarnermullu sunniuteqangaatsiarsimanera, aammattaaq ingerlatseqatigiiffik tamaat isigalugu aqutsilluarlunilu pimoorussilluarsimanera ilisimalluarlugulu qujamasuutigaarput, Royal Greenlandip pisortaanera, Susanne Arfelt Rajamand, oqarpoq.
Nils Duus Kinnerup nammineq nunatta aalisarnermik suliffeqarfissuaataaniissimanerminik tulluusimarutiginnippoq.
-Royal Greenlandimi 2008-mi sulileqqaarninnit aqqusaarsimasakka nuannersorpassuupput. Ingerlatseqatigiiffiup ineriartorneranut niuernikkullu iluatsitsilluarneranut maanna suli atuuttumut Kalaallit Nunaannilu inuiaqatigiinnut iluaqutaasumut peqataasimanera nuannerlunilu pissarsiaqarnaqaaq, taanna oqarpoq.
Siunnersuisuulluni suliffeqarfimmut attaveqaannarallassasoq, tusagassiutinut nalunaarummi allasimavoq.
Royal Greenland aningaasaqarnermut maanna pisortassarsiorpoq. Taanna Nuummi allaffeqasssaaq.
