Royal Greenland aamma Polars Seafood kattuteqquai
Royal Greenland aamma Polar Seafood kattutissasut Lars-Emil Johansenip siunnersuutigaa.
- Nunatsinni angisuumik eqqarsarnissamut piffissanngorpoq. Tuniniaasuaqqat aallaavigalugit eqqarsartarneq qimattariaqarparput. Immikkut ilisimasallit katersortariaqarpavut. Aningaasatigut isumalluutivut katersortariaqarpavut nunatsinnullu iluaqutaasussanngortillugit, sullivinnut pisortanullu ataasiakkaanut taamaallaat iluaqutaajunnaarsillugit, Lars-Emil Johansen Sermitsiaq.gl-imut oqarpoq.
Taanna isumaqarpoq nunatsinni aalisakkanik tuniniaasut angisuut Royal Greenland aamma Polar Seafood kattuppata tamanna nunatsinnut iluaqutaassasoq.
- Kattuttoqarsinnaanera qularinngilara. Taamaattorli tamatumani piumassuseqarneq massakkullu iliuuseqarsinnaaneq pisariaqarput, Siumukkormiu aviisimut taama oqarpoq.