Rockerit pillugit tusatsiakkat: Politiit pinerliiniaqatigiinnik nakkutinnipput
Nuummi tusatsiakkat naapertorlugit rockerinik Nuummut sapaatip akunnerani siuliani tikittoqarpoq.
Tusatsiakkat politiit tupaallaatiginngilaat. Taakku nunarput tamakkerlugu piffissami nakkutiginnissimallutik, Kalaallit Nunaanni Politiit pigaartuisa pisortaata, Anette Ostenfeldtip oqaatigaa.
- Danmarkimi pinerliiniaqatigiinnut attuumassuteqartunik nunatsinniittoqartoq paasivarput, taakkulu pillugit piareersimavugut.
Kavaajaasa qititaani assiliartat ilisarnaataasut
Kavaajat tunumikkut assiliartaqartut rockerinut atassuserneqakkajuttarput, Poul Kellbergilli oqarnera naapertorlugu tamanna nunatsinni ernumassutigineqassanngilaq.
Taanna danskit kriminologiat namminerisaminillu suliffeqarfiuteqarluni pitsaaliuinermik inunnillu rockerinut pinerliiniaqatigiinnullu imaluunniit taakku avatangiisiisa killingannut attuumassuteqartunik suliaqartarpoq.
- Motorcykelinik ingerlaaqatiillutik saqquminissaat takujuminaatsippara, illoqarfinniimmi illoqarfinnut angalanissat ajornaatsuunngilaq, taamaammat tamanna pissutsinut killiliisinnaagunarpoq, taanna oqarpoq.
Taassumali pinerliiniaqatigiit arlaannik pissuteqarlutik maaniinnissaat erseqqissaatigaa.
- Kalaallit Nunaanni nunani allanitulli niuerfeqarnissaa takorloorpara. Aningaasartassaqarnera takorloorsinnaavara. Pinerliiniaqatigiillu Kalaallit Nunaanniinnerannut aamma sunniuteqarniarnerusinnaavoq.
Misiliut
Poul Kellbergip oqarnera naapertorlugu pinerliiniaqatigiit sumiiffinnukartaleraangamik ikiaroornartunik niuernermik misilittaaniarnerusarpoq, kisianni aamma pinerliiniaqatigiinnut ilanngukkusuttoqarusunneranik takuniaanerusinnaavoq.
- Assersuutigalugu inuusuttunik navianartorsiungaatsiartoqarpa, nakuusersinissamut piareersimasoqarpa, ajornannginnerata appasinnerpaaffigisaani nikinnissamut piareersimasoqarpa, taamaappat inissiffissaqarnissamut periarfissaqarpoq, taanna oqarpoq.
Taamaakkaluartorli tamanna unnuinnarlugu pisinnaanngilaq, assersuutigalugu rockerini ilaasortannguinniaraanni misilittagaqartoqaqqaartussaavoq, Poul Kellberg oqarpoq.
Klubbinulli aqqusinermi aallaasersortoqalernissaa ersigineqassanngitsoq, taanna isumaqarpoq.
Ersinngitsumik sivisuumik suliaqartut
Rockerit pillugit maanna aatsaat tusarsaasoqaleraluartoq najuuttuaannarsimassasut, Poul Kellberg isumaqarpoq.
- Niuerfeqarniaraanni nioqqutissat arlaannit takkuttussaapput, taamaammat pinerliiniaqatigiit Kalaallit Nunaanniittut imaluunniit allatut annertussuseqartumik najuuttuaannarsimassagunarput, pissutsimmi aaqqissuunneqartigatik eqqussorneqarsinnaanngillat.
- Namminersorlutimmi Oqartussat aaqqissuussisuunngillat. Allanit aaqqissuunneqarpoq, taakkulu ersinngitsumik suliaqaannarput, tamanna ilisimannginneqassanngilaq, kriminologi oqarpoq.
