RIDI vejrmeldningiliortoq: Inunngorfigisimanngisamut angerlarsertoqarsinnaava?

- Sila maannakkut qanoq ippa? Arvid Jacobsen immiussineq aallartiinnaavissoq Jyllandip avannaamiorpaluttumik aperivoq, nangillunilu:

- Pingasunik kiappusi anoreqaranilu, Arvid Jacobsen oqarpoq, namminerlu apeqqutini taama akillugu.

Apersuinermi sikundit pingasut qaangiutinngitsulluunnit illarnaveersaarneq ajulerpunga, Arvid Jacobsenimi ’RIDI vejrmeldningikkut’ silassamik ilimasaaruteqartarnermini immikkuullarissumik pissuseqarnera pissutigalugu amerlasuut nuannarilluarpaat.

Illarasaarlunga silap nuannernera kiatsikkaluttuinnarlunilu seqernup nuissat akornisigut nuisalernera oqaluttuaraara.

- Aap, tamanna ilissinnut aamma neriorsuutiginikuuara. Maannalu anoreqarunnaassaasi, Arvid Jacobsen oqarpoq.

Arvid Jacobsenip tyskit, amerikamiut tuluillu silasiutaat atorlugit Nuummut silassaq nakkutigaa.

Taassuma Nuummi silap qanoq innissaa kisiat naatsorsorneq ajorpaa, aalisariarusuttoqarnissaanummi aalisarnissamut pissutsit qanoq inneri aamma nalilersortarpaa.

Aalisarnissamummi periarfissatsialaat anori, tinittarnera kiassuserlu atorlugit aamma paasineqarsinnaapput, Arvid Jacobsen oqarpoq.

Anorersuarnissaanik aallartittoq

Juullinnginnerani anorersuarnissaanik aarlerisaarut silasiorfiit allat siulittorsimanngisaat facebookikkut malinnaasorpassuaqalersitsivoq. 

- Nuuk anorlingaatsiartussaasoq ullut ilaanni takuara. Taava sulerinersusi misissorakku sakkortuumik ulussaarsuarnissaa pillugu aarlerisaaruteqarfigineqarsimanngitsusi paasivara, taava Nuummut silassamik ilimasaaruteqartariaqarlunga eqqarsarpunga, ulussaarsuarnissaami ilisimarpasinnginniassiuk, Arvid Jacobsen oqarpoq.

Jyllandip avannaamiu, 62-inik ukiulik Frederikshavnimi nammineq angerlarsimaffimmini TV-kkut aallakaatitsisartoq Facebookimi maanna 1600-nik malinnitseqarpoq.

Frederikshavnimit sunngiffinni nuannariinnarlugu silassamik ilisimasaaruteqartarpit?

- Tassa taamaappoq. Biilernermimmi ilinniartitsisuuvunga. Qangaanersoq igasuugaluarpunga. Taamaammat igasunngorniarninni Kalaallit Nunaanni angalanikuuvunga, Arvid Jacobsen oqarpoq.

Angerlarserneq

RIDI vejrmeldningikkut silassamik ilimasaaruteqartartoq nunatta kitaani umiarsuarmik 1976-imi angalanermini Nuuk nuannarillualerpaa. Taanna Nuummit Sisimiunut Aasiannullu angalavoq. Tamatumalu kingorna Mexicomut ingerlalluni. Nuulli immikkut sunniuteqarpoq.

- Kalaallit imaluunnit Nuummiut nuannarillualerpakka, taakkumi qanillilluarpakka, inuit allaanerulaartut ikinngutigillualerpakka. Inuit inussiarnersuupput kisianni Nuummiunut iluamik pissuserissaartoqartussaavoq, Arvid Jacobsen oqarpoq.

Tikeraarnissannik pilersaaruteqarpit?

- Coronap nalaaniunngitsoq aamma akisoorujussuuvoq, Arvid Jacobsen oqarpoq.

Sooruna Nuummut kisimi silassamik ilimasaaruteqartarpit?

- Sisimiunit imaluunniit Aasiannit attavigineqarluaruma taakkununnga silassamik aamma ilimasaaruteqarsinnaavunga. Kisianni Kalaallit Nunaannut tunngasumik silassamik ilimasaaruteqarnissaat ajornakusoortorujussuuvoq, qaqqammi portullutillu imaqarpoq, tamannali nuannequtaaginnarpoq, Arvid Jacobsen oqarpoq.

’RIDI vejrmeldningimik’ silamik ilimasaaruteqartartoq ataasiarluni nunatsinniinnikuuvoq, taamaakkaluartorli nuna maqaasisarpaa.

- Naluara inunngorfigisimanngikkaluarlugu angerlarsertoqarsinnaanersoq, Arvid Jacobsen ataasiarluni nunatsinniinnikuusimanini pillugu oqarpoq.