Umiarsuaq Canadaliarallarpoq: Immap naqqatigut kabelimik iluarsaassineq unitsinneqarallarpoq
Sila sarfarlu matumani pissutaapput. Umiarsuaq Kujataani Avannaanilu immap naqqatigut kabelimik iluarsaassisoq unitsikkallarneqarpoq, umiarsuarlu Canadamut uterallartariaqarsimalluni. Tele-Post tusagassiutinut nalunaarummi taama ilaatigut allaaserisaqarpoq.
Iluarsaassisussat Qaqortup avannaatungaani piffissap kingulliup ingerlanerani iluarsaasseriaraluartarsimapput, silarlunnerali pissutaalluni uniinnartariaqarsimallutik. Silarlunnera pissutaalluni sulineq ilaatigut ajornakusoorsimavoq, atortullu ilaat allaat kivisoorneqartarsimallutik.
AAMMA ATUARUK Umiarsuaq kabelimik aaqqissuiartortoq Sisimiunut aallarpoq
Umiarsuaq iluarsaassisussaq tamanna pillugu Canadami St.Johnsimut utiinnartariaqarsimavoq, atortut annaasat taartissaat pissarsiarineqassallutik, soorlu aamma inuttat taarserneqartussaallutik.
- Nunatta kujataani avannaanilu atuisutsinnut tamanna uggornarluinnarpoq utaqqigaluarmassummi naliginnaasumik attaveqaqqilernissartik. Pisariaqartippagulli silaqqik iluarsaassinermilu sakkut eqqortut aamma kujataani sila ajormat allamillu periarfissaqannginnatta umiarsuaq Canadamut uterallartariaqarsimavoq. Umiarsuup sapinngisamik sukkanerpaamik uteqqinnissaa siunertaraarput kujataani avannaanilu iluarsagassat sapinngisami iluarsigasuarneqarniassammata, Tele-Postimi pisortaaneq Kristian Reinert Davidsen taama oqarpoq.
AAMMA ATUARUK Umiarsuaq immap naqqatigut kabelimik iluarsaassisussaq Qaqortuliartinneqassaaq
Immap naqqatigut kabelip iluarsaanneqarnera nutaamik maanna pilersaarusiorneqassaaq, sumiiffinni pineqartuni sikup silallu qanoq innerat aallaavigalugit pilersaarusiortoqassalluni.
Kujataani atuisartunut aqqutit, immap naqqatigut kabelimik iluarsaassisoqarnerata nalaani qaminneqarnikuupput, immallu naqqatigoortumik kabelimik iluarsaassineq unitsikkallarneqarmat TELE-POST-ip Islandip tungaanoortoq immap naqqatigoortoq kabeli attavilerallarsinnaalerpaa.
Atuisut ullumi pingasunngornermi aprilip ulluisa qulinganni unnugumiit internettimut attaveqaqqilernissartik, TELE-POST-imi atuisut inuinnaat taamaattumik naatsorsuutigisinnaavaat. Tele-Post taama nalunaaruteqarpoq.
AAMMA ATUARUK Immap naqqatigut kabelip allatigut kittorarsimanera paasineqartoq