Ila arraa: Immap naqqatigut kabelip allatigut kittorarsimanera paasineqartoq
Tele-Post taama ilisimatitsivoq.
Sisimiuniimmi Aasiannut immap naqqatigut kabelikkut attaveqannginnera iluarsaassisut paasivaat, kinguniatsianngualu paasineqarpoq immap naqqatigut kabeli Sisimiut avannaatungaanni kilometerinik 70-inik ungasitsigisumi aamma kittorarsimasoq.
Kittorarsimaneranut pissutaasoq suli ilisimaneqanngilaq. Tamanna Tele-Postip immikkut ilisimasallit peqatigalugit maanna misissorpaat, sunali pissutaarpiarnersoq kabeli sukumiinerusumik misissorneqareerpat aatsaat paasineqarsinnaassagunarpoq.
Immap naqqatigut kabelip kittorarnera pissutigalugu Sisimiunit avannamut internetti arriippoq. Internettikkummi attaveqaatit Aasiannit Sisimiunut suli sakkorsaavikkoortinneqarmata.
Sisimiunili Kangerlussuarmilu internetti sukkasooq pingasunngornerup ingerlanerani atuutileqqissasoq, Tele-Postip ilisimatitsissutigaa. Kabelimmi Sisimiut kujataanni kittorarnerata iluarsaanneqarnera marlunngormat unnuakkut naammassineqarpoq.
AAMMA ATUARUK Umiarsuaq kabelimik aaqqissuiartortoq Sisimiunut aallarpoq
Paasissutissat
- Immap naqqatigut kabeli Sisimiut kujataatungaani januaarimi pivoq.
- Kabelip allatigut kittorarnera Sisimiut avannaatungaanni kilometerinik 70-inik ungasitsigisumi pivoq.
- Immap naqqatigut kabelip kittorarnera alla Kujataata avataani decembarimi pivoq.
- Immap naqqatigut kabeli 300-400 meterinik ititigisumi siaarneqarpoq.
Sisimiunit Upernavimmut internettikkut attaveqaatit januaarip 21-anili arriitsuararsuanngorput.
Umiarsuaq kabelip kittorarfianukarsinnaanngitsoq
Aammattaaq immap naqqatigut kabeli Kujataata avataani decembarip qaammataani kittorartoorutigineqarpoq. Tamatumunnga pissutaasoq aamma ilisimaqqissaarneqanngilaq, innuttaasulli Islandimut attavilerneqarput avannaanisullu internettimik arriitsumik atugaqaratik.
- Takorlooruminaalluinnaraluarpoq immap naqqaniittut kabelit pingasut ataatsikkut ajutoorsinnaasut kisianni pissutsit piviusut massakkorluinnaq taamaapput, pisortaaneq Kristian Reinert Davidsen taama oqarpoq.
AAMMA ATUARUK Kilisaatip immap naqqatigut kabeli ajoquseraa: Eqqartuussissuserisup suliaq misissuiffigaa
Umiarsuaq immap naqqatigut kabelimik iluarsaassiartortinneqartoq sikoqarpallaarnera pissutigalugu kabelip Sisimiut avannaatungaani kittorarfianukarsinnaanngikkallarpoq. Sisimiut avannaani sikoqartupilussuuvoq aamma qularnarpoq piffissami qanittumi allanngortoqarsinnaanissaa, Tele-Post taama ilisimatitsivoq.
Kujataani anorersuartoq
Kujataani aamma silarluppoq. Ulluni tulliuttuni anorersuartussaavoq umiarsuarlu taamaalilluni Qaqortup avataani iluarsaassisinnaassanani.
Taamaammat umiarsuaq Nuummut utaqqiartortinneqarpoq. Pissutsit iluarseriarpata immap naqqatigut kabelimik iluarsaassineq tulleq umiarsuup erngerluni aallartissavaa.
- Sila naalagaavoq. Taamaattumik utaqqiinnartariaqarpugut malinnaavigalugillu siku silalu nalilersorlugulu qaqugu sumullu umiarsuaq iluarsaassiartortissanerlugu. Paasisaqarluariarutta nalunaarumaarpugut, Kristian Reinert Davidsen oqarpoq.