Kilisaatip immap naqqatigut kabeli ajoquseraa: Eqqartuussissuserisup suliaq misissuiffigaa
Immap naqqatigut kabeli kilisaammit ajoquserneqarsimasoq Tele-Postip pisortaa Kristian Reinert Davidsen KNR-imut oqarpoq.
- Immap naqqatigut kabelimik kittoraaneq ilungersunartuuvoq. Immammi assingani nalunaarsorneqaqqavoq, Kristian Reinert Davidsen oqarpoq.
Taamaammat pisumullu atatillugu umiarsuaateqarfik kilisaammik piginnittoq suliffeqarfiup eqqartuussissuserisuanit attavigineqarsimavoq. Pisorli politiinut suli unnerluutigineqarsimanngilaq, suliarlu suli suliaammat allanik oqaaseqarsinnaanngilaq.
AAMMA ATUARUK Tele-Post eqqunngitsuliorfigineqartoq
Immap naqqatigut kabeli kilisaatinit angallatinillu allanit qanillattorneqartillugu Aasiaat Radioa mianersoqqusisarpoq.
- Aasiaat radioa aqqutigalugu nakkutiginiarparput. Aamma kilisaatit sorliit arriitsumik qanilliartornersoq taakka nakkutigisarpaat, Arriikkaangatami tamanna kilisannerannut takussutissaasarpoq, Kristian Reinert Davidsen oqarpoq.
Uanilu pisumi taamaattoqarsimanersoq Tele-Postip oqaaseqarfigerusunngilaa.
- Qanilligaangata kalerrinniartarpagut. Umiarsuaateqarfiit amerlanerit uunga ajornartorsiummut tunngatillugu attaveqarfiginiarsaraavut. Taakkuami immap naqqani kabelip kittorarneqarnera ilungersunartuusoq umiarsuaatiminnut erseqqissaatiginiassammassuk. Taarsiisinnaatitaanerit allallu eqqarsaatigalugit, Kristian Reinert Davidsen oqarpoq.
Kujataani immap naqqani kabeli decembarip qaammataani aamma kittorarpoq. Taanna qanoq ililluni innarlersimanersoq suli paasineqanngilaq, internetimulli attavik Islandi aqqusaarlugu ingerlalermat atuisut arriinnerusumik internetseqanngillat.
Umiarsuaq immap naqqatigut kabelimut aaqqissuiartortussaq issittumi sulisinnaanngorlugu Canadami maanna piareersaleruttorpoq. Umiarsuaq Halifaximit februaarip ulluisa 16-iani aallassaaq Nuummullu kingoraartissanik februaarip 25-ani aalleriarluni aqaguani avannamut ingerlaqqinnissaa Tele-Postip naatsorsuutigaa.
