Umiarsuaq kabelimik aaqqissuiartortoq Sisimiunut aallarpoq
![](/sites/default/files/styles/image_934x467/public/article_images/horizon_enabler.jpg?itok=uIocvPPb)
Sisimiuniit avannamut qarasaasiakkut attaveqaatinik arriitsumik atugaqartitaasorpassuarnut nuannersumik tusagassaqarpoq. Umiarsuaq immap naqqani kabelimik aaqqissuiartortoq Sisimiunut aallarpoq.
AAMMA ATUARUK Umiarsuaq iluarsaassiartortoq Nuummut kiisami tikittoq
- Sila ajunngippat aammalu sikoqarpallaanngippat naatsorsuutigineqarpoq Sisimiut kujataatungaani iluarsaassineq marsip qeqqata missaani naammassineqassasoq, Tele-Post tusagassiuutinut nalunaaruteqarluni taama allappoq.
Immap naqqatigut kabeli jannuaarip 21-anni ajoquserneqarpoq.
Pisortaaneq: Neriuutigaarput piffissaq pilersaarutigisarput malikkumaarlutigu
Tele-Postip nalunaarutaa naapertorlugu umiarsuaq Horizon Enabler pingasunngornermi marsip ulluisa arfernganni Nuummut tikippoq kabeli kingoraartissaq aallullugu, tassa kabelip Sisimiut kujataatungaaniittup taartissaa.
- Naatsorsuutigineqarpoq umiarsuaq sapaatit akunnerata naanerani apuutissasoq, tamatuma kingorna iluarsaassineq aallartinneqassaaq.
- Sikoqarnera apeqqutaassaaq kabelip imaatigoortup qanoq pilertortigisumik iluarsaanneqarnissaanut, kisianni neriuutigaarput piffissaq pilersaarutigisarput malikkumaarlutigu, Tele-Postimi pisortaaneq Kristian Reinert Davidsen oqarpoq.
Sisimiut kujataani iluarsaassineq naammassineqariarpat taava Horizon Enabler kujataanut ingerlaqqissaaq, tamaani iluarsaassineq tulliuttoq aallartinneqassalluni.
Imaatigut kabelimik iluarsaassinerit malinnaaffigineqarsinnaapput nittartakkami telepost.info/da
AAMMA ATUARUK Kilisaatip immap naqqatigut kabeli ajoquseraa: Eqqartuussissuserisup suliaq misissuiffigaa