Assi: Turid Bjarnason Skifte

Rektorip Isumaginninnermik Siunnersortinngorniarfik Nuummiitsiinnarniaraa

Isumaginninnermik siunnersortinngorniarfik Ilisimatusarfimmiikkuni pitsaanerpaassaaq. Ilisimatusarfimmi rektoriugallartoq Suzanne Møller taama isumaqarpoq.

Naalakkersuisut Isumaginninnermik Siunnersortinngorniarfik Ilulissanut nuunnialikkersaalermassut taama nalunaaruteqartoqarpoq.

Ilinniarfiup nuunneqarnissaa aalajangiiffigineqareersoq Naalakkersuisut siulittaasuata Kim Kielsenip nalunaarutigeqqammerpaa, Naalakkersuisoqataatali Sara Olsvigip suli aalajangiisoqannginnerarpaa, ilinniarfiullu nuunneqarnera ilinniakkap pitsaassusaanut akornutaassussaannginnerarlugu.

Suzanne Møllerip isumaginninnermik siunnersortinngortussat Ilisimatusarfimmiikkunik pitsaanerussasoraa, inuiaqatigiinnimi ajornartorsiutaasut paasiuminaassinnaasut inuiaqatigiinnut ilisimatusaatinik sammisaqartunit assigiinngitsunit amerlanertigut akissutissarsivigineqarsinnaasarmata, Ilisimatusarfimmilu ilinniakkat allat iinniakkamut tassunga iluaqutissartaqarput aammattaaq isumaginninnermik siunnersortinngorniat ilinniarfiat ilinniarfinnut allanut iluaqutissartaqarluni.

Taamaammat nukit ataatsimoortillugit suliamut tassunga, aningaasaqarnikkut aqutsinermullu atatillugu tamarmik Ilisimatusarfimmiitinnissaat isumassaqarnerusoq, Suzanne Møller isumaqarpoq.

Ilinniarfik maanna sumiiffimmiinnera ilisimatuutut misissuinermik tunngavilersorneqarpoq.  Møller naapertorlugu, ilisimasat uningaannartuunngimmata aammattaaq Ilisimatusarfimmi ilinniartitsisissutineqartartut ilisimatuutut misissuinernik nutaanerusunik aallaaveqartarmat tamanna iluaqutissaavoq.

- Ilinniartunullu ullumikkut neqeroorutigisartagarpoq taamaappoq. Ilinniarfik Ilisimatusarfiup avatangiisiinut naleqqussarnikuuvoq, taamaammallu inuiaqatigiinnit kissaatigineqarneratulli ilinniakkap pitsaassusaa qulakkeersimaaginnarniarlugu ilisimatusarnermik tunngaveqaannartikkusuppara, Ilisimatusarfimmi rektoriugallartoq Suzanne Møller oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl