Rektori ilinniartitsisussaalatsigami kalaallisoortitsinissat taamaatittarai

Piukkunnartunik kalaallisoortitsisussarsiorneq Nuummi ilinniarnertuunngorniarfiup, GUX Nuup, rektoriata, Hanne Larsenip, tamaviaarutigisimagaluaqalugu iluatsinngitsoorpaa. Piffissamili qaninnermi kalaallisoortitsisussarseriaannaassanganngilaq.

Allattoq Anders Rytoft

novembarip 06-at 2023 07:42

Nutserisoq Hanne Petersen

Kalaallisoorneq nunatsinni ilinniarnertuunngorniarfinni pinngitsoornani atuartitsissutaaniartussaagaluarpoq. Piukkunnartunilli kalaallisoortitsissussarseriaannaasannginneq ajornartorsiutaaqaaq.

Nuummi ilinniarnertuunngorniarfiup GUX Nuup rektoria, Hanne Larsen, taama oqarpoq.

Kalaallisoortitsisussaalatsinermi GUX Nuummi qangali ajornartorsiutaasoq, taassuma isertuutinngilaa. Kalaallisoortitsisut sisamat tulleriillutik siorna aamma soraarput. Tamatuma kingornali kalaallisoortitsisussarsiortilluni qinnuteqarsimasuni marluk oqaloqatigisaata akissaatitaasut paasigamikkit atorfininnissamut qujaannarsimasut, rektori oqarpoq.

Atuartitsinerit aggustip ulluisa qulingiluaanni aallarteqqimmatali GUX Nuuk piukkunnartunik pingasunik kalaallisoortitsisoqarpoq. Taakkunannga marluk ornigullutik atuartitsisarput, pingajualli illoqarfimmi allami najugaqarmat attaveqaatitigut atuartitsisarpoq.

Ilaatigooriarluni kalaallisoortitsisoqaavittanngitsoq

Ilaatigooriarluni kalaallisoortitsisoqaavittanngimmat ilinniarnertuunngornianik kalaallisoortitsinermik immikkut ilinniarsimanngitsunik, tassa ilinniartitsisunik meeqqat atuarfianneersunik ilinniartunillu Ilimmarfimmeersunik Hanne Larsen atorfinitsitsisariaqarsimavoq. Taakkuali atuartitsiartoriaannaajuaasanngillat. Atuartitsiartoriaannaanngikkaangatalu rektorimita qanoq iliortarpa?

- Taamaattoqartillugu kalaallisoortitsisussaqaavinngitsoq ilinniarnertuunngorniat klassiannukarlunga oqarfigiartortariaqartarpakka, Hanne Larsen oqarpoq nangillunilu:

- Ilinniarnertuunngorniat kalaallisoortitsisui taarseraakkajupput. Aammali kalaallisoortitsisoqanngivissortaqarput. Tassa aalajangersimasunik kalaallisoortitsisoqanngillat. Tamanna kalaallisut amigartumik naleqqutinngitsumilluunniit atuartinneqarnerannik kinguneqartarmat ajorpoq.

PAASISSUTISSAT

GUX Nuuk

500-t missaannik ilinniarnertuunngorniaqarpoq.
Pinngitsoornani kalaallisoortitsisoqartarnissaanut piukkunnartunik arfineq-pingasunit ikinnerunngitsunik kalaallisoortitsitoqarnissaq pisariaqarpoq, tamatumani atuartitsissutini allani aamma ilinniartitsisuunersut apeqqutaalluni.

Nunatsinni ilinniarnertuunngorniarfiit

GUX Nuuk - kalaallisoortitsisussaalatsivoq
Campus Kujalleq - kalaallisoortitsisussaalatsinngilaq.
GUX Aasiaat - kalaallisoortitsisussaalatsivoq.
GUX Sisimiut - kalaallisoortitsisussaalatsinngilaq.

Kalaallisoortitsinermik ilinniagallit

Nunatsinni ilinniarnertuunngorniarfinni kalaallisoortitsisut amerlaneruleqqullugit oqaasilerinermik atuakkialerinermillu Ilisimatusarfimmi ilinniagallit amerlanerunissaat pisariaqarpoq.
Oqaasilerinermik atuakkialerinermillu ukiuni kingullerni marlunni ukiumut sisamaapput, kalaallillu taassuminnga ilinniagallit nunatsinni pisariaqartinneqaqaat.

Najoqqutat: GUX Nuuk aamma Naalakkersuisut.

Allisiguk

Ilinniarnertuunngorniat misilitsinnissamut taamaalillutik pissarsiaqarluanngitsuulersarput. Pissutsimmi taamaatsillugit soorunami pissarsiaqarluanngitsuulersarput, ilinniarnertuunngornialli juullereernerani akunnerit kalaallisoorfissaat amerlinerisigut GUX Nuup tamanna pakkersimaarniarniarpaa.

Ilinniarnertuunngorniarfiit allat

Piukkunnartunik kalaallisoortitsisussarsiorniapiloortarneq nunatsinni ilinniarnertuunngorniarfinni ajornartorsiutaaqisoq, Inatsisartunut ilaasortap Inuit Ataqatigiinneersoq, Mariia Simonsenip, qangali maluginiarsimavaa. Tamannalu ilumoortoq naalakkersuisunit tamannarpiaq pillugu allagarsigami uppernarsivaa.

- Kujataanigooq ilinniarnertuunngorniarfik, Campus Kujalleq (aamma GUX Sisimiut, aaqq.)) kisimi kalaallisoortitsisussaalatsinngilaq. Tamanna soorunami qujanarpoq, nunatsinnili ilinniarnertuunngorniarfiit sinneri, ingammik Nuummiittoq, kalaallisoortitsisussaalatsipput, taanna oqarpoq.

- Oqaatsivut asseqanngilluinnarput. Nunarsuup sinnerani atugaanngillat, aamma inuususseruttornermi ilinniarnertuunngorniarneq sutigut tamatigut ilikkariartorfiunerpaakkajuppoq. Piukkunnartunik ilinniartitsillaqqittunillu kalaallisoortitsisoqarnissaat pingaaqaaq.

Eqqasunnaqisoq

Kalaallisoortitsisussaalatsinerup ajornartorsiutaaneranik anngussinnaarnani ilinniarnertuunngornianik kalaallisoortitsisut amerlinissaat qanoq iliuuseqarfigilersaarniarneraat Mariia Simonsenip naalakkersuisunut apeqqutigaa. Ilinniartitaanermut naalakkersuisoq, Aqqaluaq B. Egede (IA), akissummini ilaatigut ima allappoq:

- Naalakkersuisut ilinniartitaanermut tunngatillugu pitsaanerulersitsinermut suliatik attanniarpaat peqatigalugulu inuiaqatigiit pisariaqartitaat unammilligassaallu iliuuseqarfigalugit.

Aqqaluaq B. Egedep akissutaa Mariia Simonsenip naammaginartinngeqaa.

- Eqqasunnaqaaq. Ilinniarnertuunngorniarfinni kalaallisoortitsinissat taamaatinneqartarnerat kalaallisoortitsisoqartarunnaavinnissaaluunniit pakkersimaarniarlugit naalakkersuisut ajornartorsiut tamanna qanoq iliuuseqalertorfigisariaqarpaat. Tassunga killissimanerput ajuimmat ajornartorsiut tamanna ilaginnaannarsinnaanngilarput.

Tamanna Inatsisartut kultureqarnermut ilinniartitaanermullu ataatsimiititaliaanni pinngitsoornatik oqallisigiumaaritsik naalakkersuisorlu tamatumunnga aggersarumaaritsik, Mariia Simonsen erseqqissaavoq.