Karl Kristian Kruse: Raajanut iluatsittoq qaleralinnut atorneqarsinnaanngilaq

Raajat pisassiissutigineqartut aqulluarneqarsimanerisigut iluatsitsilluarneq qaleralinnut atorneqarsinnaanngitsoq, aalisarnermut naalakkersuisoq Karl Kristian Kruse isumaqarpoq.

Ilisimatuut siunnersuisarnerat aalisartullu aalisarnerminni ilisimasaat nalaattagaallu, naalakkersuisup, Qanoruumit apersorneqarnermini,  assigiinngippallaarnerarpai. 

AAMMA ATUARUK Raajanut tunngatillugu iluatsitsilluarneq qaleraleqassutsimut atorneqarsinnaavoq

- Illuatungeriit naapeqatigiiffigisinnaasaminnik nassaarlutik innersuussuteqarnerat malillugu politikkikkut ajornaquteqanngitsumik ingerlaarfigineqarsinnaavoq. Kisiannili naalakkersuisoqatigiinnermik isumaqatigiissut malillugu atuisut ilisimasaasa, ilisimatuussutsikkullu ilisimasat, ilisimatuussutsikkut suliat tamakkiisunngorsimatinnagit, taakkua pisassiisarnermut toqqammagineqarnerat suli massakkumut ingerlavoq, Karl Kristian Kruse oqarpoq.

Aalisartuniilli paasissutissat maanna atorneqalereersut uumasunik ilisimatuup, pinngortitaleriffimmeersup, Rasmus Nygaardip oqaatigaa.

- Aalisartut tunisaminnik paasissutissaataat logbogiliarisartagaallu atorpagut, taamatullu suleqatigiissuteqarpugut, Rasmus Nygaard oqarpoq.

Rasmus Nygaardip aalisartut namminneq nalunaarusiaat, tassa logbogiliaat, paasissutissanik assersuutigalugu qassinik oqummersaqartigisarnerannik, qassutit qanoq atortigineraat qanorlu pisaqartiginerannik imaqartut 2008-mi atorneqartalersimasut oqaatigaa.

AAMMA ATUARUK Aqutsilluarneq raajaqassutsimut iluaqutaasoq

Aalisartut nalunaarusiaannit paasissutissat tunitsivinniillu paasissutissat atorlugit Pinngortitaleriffik umiarsuit marluk atorlugit  misissuisarpoq. Sumiiffinni aalisakkat immap naqqaniittut qanoq imminnut qanitsiginerat qanorlu amerlatiginerat taakkunanilu qassit pisarineqarsimanerat misissorneqartarpoq.

Naalakkersuisulli aalisartut nalunaarusiaat aalisarnermilu misilittagaat naammattumik atorneqarpallaanngissorai.

- Taamaammat ilisimasat annertunerunissaannik suliaqartitsinerit annertuut ingerlapput. Aamma suli nukittorsaqqinneqartussaassapput. Illuatungerisanut naapeqatigiiffigineqarsinnaanera anguneqarsinnaaqqullugu, Karl Kristian Kruse oqarpoq.

Rasmus Nygaardip tamatumunnga atatillugu Pinngortitaleriffimmiit allanik suliniuteqartoqarnerarpaa.

- Allamik suliaqarnitsinnut atatillugu aalisartunut toqqaannartumik apeqqutinik akisassanik suliaqarpugut, tassani ukiumi aalisarnerat qanoq innersoq apeqqutigaarput, Nygaard oqarpoq.

AAMMA ATUARUK Qalerallit 2013-imi tunineqartut amerlassusii anguneqartut

Aammattaaq aalisakkeriviit immikkoortiterivianit suli suliarineqanngitsunut paasissutissat tunngasut  pissarsiarineqarsinnaalersimapput.

- Tunitsiviit paasissutissanik eqqornerusunik tunniussisinnaanerisigut misissuinitsinni nakkutiginninnerulissaagut, Rasmus Nygaard oqarpoq. 

Rasmus Nygaard naapertorlugu apeqqutinut akisassanut sananermi periuseq Europami atorneqarpoq, tassanngalu aalisartut ilisimasaat uumassusilerisut ilisimasaannut assingukannertartoq misilittagarineqarpoq.