Aqutsilluarneq raajaqassutsimut iluaqutaasoq
Kitaata imartaani raajartassiissutit 2013-imi pisassiissutigineqartut assigaat.
2000-imit pisassiissutigineqartut qaffasinnerpaagamik 124.000 tonsiupput 2015-imi appasinnerpaagamik 73.000 tonsiullutik.
Pisassiissutigineqartullu qaffakkiartoqqilerput, tamannalu Pinngortitaleriffiup aalisarnermi logbogiliarineqartut namminerlu misissuinini tunngavigalugit siunnersuinera tunngavigalugu pivoq.
- Paasissutissat taakkunannga pissarsiarisagut takutippaat raajaqassuseq ukiuni kingullerni siuariartorfiuvoq, Pinngortitaleriffiup aalisakkanut qalerualinnullu immikkoortortaqarfiani biologi Anndorte Burmeister taama oqarpoq.
Nunanilu allani misilittagaqarfigineqartut innersuussutigai.
- Ilisimaneqarpormi nunani allani raajaqassuseq kinguariartuleraangat pisassiissutigineqartut killileraanni, taava soorunami raajaqassutsip siuariartoqqilernissaanut tamanna sunniuteqarsinnaasoq, biologi oqarpoq.
AAMMA ATUARUK Raajartassat amerlanerusut nuannaajallaatigineqanngitsut
Anndorte Burmeisterip erseqqissaatigaa raajaqassutsip annertussusianut pissutsit arlallit aalajangiisuusartut, soorlu assersuutigalugit avatangiisitigut pissutsit qanoq inneri, soorlu immap kissassusia, nerisassaqarneq ukiullu ilaanni ukiut siuliinut naleqqiullugu raajat mikinerit amerlanerusarnerat. Avatangiisitigulli pissutsit siunnersuinerlu pisassiissuteqarnermi tunngavineqartup assigiinngissutaat annertuupilussuuvoq.
- Iliuuseqarfigineqarsinnaasorli tassaavoq aalisarnerup aqunniarneqarnissaa. Iliuuseqarfigineqarsinnaanngitsullu tassaapput avatangiisitigut sunniutaasut, Anndorte Burmeister taama oqarpoq.
AAMMA ATUARUK 2018-imi raajartassat aalajangerneqartut
Kaare Winther Hansenillu WWF-imeersup iluatsitsilluarnertut taavaa.
- Raajanut tunngatillugu pitsaalluinnartutut isigaara, aqutsinissamummi pilersaaruteqarnerup Kalaallit Nunaata aningaasarsiornikkut annertuupilussuarnik iluaqutissartaqarneranik takutitsivoq, WWF-imi suliniutinik aqutsisoq Kaare Winther Hansen taama oqarpoq.