WWF: Raajanut tunngatillugu iluatsitsilluarneq qaleraleqassutsimut atorneqarsinnaavoq
WWF-ip sulianik ataqatigiissaarisuata, Kaare Winther Hansenip raajat amerleqqinnerat ajasoorutigaa. 2015-imimi raajartassiissutit 75.000 tonsiinnaammata ingerlalluanngitsutut isikkoqarpoq, maannalu 2018-imi pisassiissutigineqartut 2018-imi 101.250 tonsiupput.
- Taava tassa imaappoq raajartassiissutit ukiuni pingasuni apparnerisigut nunatsinni aalisarnermi pingaarnerpaatut inissisimareersoq kingumut uterteqqinneqarpoq, Kaare Winther Hansen oqarpoq.
AAMMA ATUARUK Aqutsilluarneq raajaqassutsimut iluaqutaasoq
Periaaseq allatigut atoerneqarsinnaasoq
Raajartassiissutit amerlineqarnerat pimoorussilluni isiginiarneqartariaqartoq aalisakkanullu peqassutsit tungaatigut unammillerfiusunut suleriaqqinnissamut atorneqarsinnaassutut nalilerpaa.
- Raajanik iluatsitsilluarnerput Qeqertarsuup Tunuani qaleralinniarnermut appariartupiloortumut toqqaannartumik atorsinnaavarput. Misissuinerillu tamarmik takutippaat Qeqertarsuup Tunuani aalisapiluttoqartoq.
KNAPK-miilli Henrik Sandgreen taama iliorusunngilaq, raajartassiissutillu amerlineqarnerat nuaannaarutigaa.
(( - Aalisariaatsini allani periuutsimut tassunga assigusumik aqutseriaaseqarnissaq naleqqussartariaqaleripput. Ilaatigut innersuussinerit tunngavigalugit appaasoqassappat 12,5 procentimik killeqarpoq paarlattuanillu qaffaasoqassappat aamma 12,5 procentimik killeqarluni.))
Henrik Sandgreen taama oqarpoq.
Kaare Winther Hansenip aalisagaqassutsip ukiuni arlaqanngitsuni aaqqeqqinneqarsinnaanerat aalisakkanik sukkasuumik isertitaqarneruleqqissinnaasugut isumaqarpoq.
- Silatusaartumik ingerlatsinissamut pilersaarusiorluta aalisakkat uku amerlassusaat aaqqiivigigutsigit Qeqertarsuup Tunuani aalisarnermi siunissaq ungasinnerusoq eqqarsaatigalugu aningaasarsiorluarnerusinnaaqqilissaagut, Kaare Winther Hansen oqarpoq.
