RAL: Kalaallinik piginnaasatigut piukkunnaatilinnik qinnuteqartoqarnissaa amigaateqarpugut
Folketingimut ilaasortap Doris Jakobsenip Royal Arctic Linep nunatsinneersunik Danmarkimi naammattunik atorfitsitsisannginneranik isornartorsiuinera eqqortuunngilaq.
Royal Arctic Linemi attaveqaqatigiinnermut pisortaq Jakob Strøm taama oqarpoq:
- Taamatut isornartorsiuteqarnera paasiuminaatsilaarpara. Sunali anguniagaanersoq takutsinnaalluarpara.
Danskit inatsisaat: Piginnaasat naapertorlugit atorfinitsitsisoqassaaq
Doris Jakobsen sapaatit-akunnerata ingerlanerani tusagassiorfinnut nalunaaruteqarluni allappoq Royal Arctic Linep Aalborgimi immikkoortortaqarfianut pulaarnerminut atatillugu sulisunit 145-usunit pingasuinnaat nunatsinneersuuneri paasisimallugu. Tamannalu pissutigalugu suliffeqarfiit Namminersorlutik Oqartussanit pigineqartut, ilaatigut Royal Arctic Linep, kalaallinik amerlanerusunik atorfinitsitsinissaannik piumasaqaateqarpoq.
AAMMA ATUARUK Kalaallit Aalborgimi suliffeqarfinni Dorisip sulilersikkusukkai
Taamali ajornanngitsigisumik iliortoqarsinnaanngilaq, Jakob Strøm isumaqarpoq. Siullertut, sulisunik nunanit allaneersunik atorfinitsitsinissamut piumasaqaatit danskit suliffeqarnermut inatsisaaniittut ersarissupilussuupput:
- Danmarkimi inatsisiliorneq malillugu sumiuussuseq tunngavigalugu immikkoortitseqqusaanngilagut, taamaammat atorfinitsitsiniarnermi piginnaasat apeqqutaalluinnarput.
RAL: Kalaallit qinnuteqartartut ikippallaarput
Kalaallit Danmarkimi inuiaqatigiinnut akuulersinniarneqarnissaannut, ilaatigut Danmarkimi suliffeqarfinni sulilersinnissaannut, suliniutinut danskit naalagaaffiat 4 millionit koruuninik aningaasaliissuteqaqqammerpoq. Suliassamilu tassani suliffeqarfik RAL-itut ittoq ikiuuttariaqartoq, Doris Jakobsen isumaqarpoq.
Jakob Strømili naapertorlugu Danmarkimi inatsisiliorneq ajornartorsiutit anginersarinngilaat, RAL-illi Aalborgimi immikkoortortaqarfianut kalaallit qinnuteqartartut ikippallaarnerat. Assersuutigalugu ilinniarsimanngitsumut atorfimmut qinnuteqaatinik 293-inik RAL qanittukkut pissarsivoq, taakkunanngalu arfineq-marluk nunatsinneersuupput. Taakkunannga marluk oqaloqatigineqarput arlaannaalli atorfimmut piginnaasatigut piukkunnaateqanngilaq.
Tamannalu ajornartorsiutaasoq, Jakob Strøm isumaqarpoq, aamma RAL-ip isumaginninnikkut akisussaaffimmik tiguserusunneranut tunngatillugu.
- Suliffeqarfittut isumaginninnikkut akisussaassusermik tiguserusuttutut imminut nittarsaattarpusi. Piginnaasatigut tamakkiisumik piukkunnaateqanngitsunik, piffissalli ingerlanerani piukkunnaateqalersinnaasunik atorfinitsitsineq, isumaginninnikkut akisussaassusermik tigusinerussanngila?
- Nunani tamalaani umiarsuaatileqatigiiffiit najukkami suliffigisaminni sulisussarsiniartarnermikkut isumaginninnikkut akisussaataqaanertik oqaatigisarpaat. Maanna killormut iliornissatsinnik oqaluttoqarpoq, aamma pitsaasutut isigaara, kisianni oqimaaqatigiissaagassaavoq, danskinimmi, serbiamiunik imaluunniit Syriamit qimaasunik aamma tigooqqaasariaqalissagatta.
Jakob Strømip erseqqissaatigaa kalaallit qinnuteqartut piginnaasaasa qinnuteqaataasalu pitsanngorsarnissaat pillugit Royal Arctic Linep politikerit allallu oqaloqatigisinnaakutsoorai.
