Kalaallit Aalborgimi suliffeqarfinni Dorisip sulilersikkusukkai

Folketingimut ilaasortaq Siumumeersoq, Doris Jakobsen, ilaatigut kalaallinut suliffissaqartitsiniarnermut Aalborgimi suliniutaasunik alakkarteraluni sapaatit-akunnerata siuliani Aalborgimiissimasoq taama oqaluttuarpoq.

- Kalaallit 3000-it missaanniittut Jyllandip avannaani ullumikkut najugaqarput, taakkulu amerlanerpaartaat inooqataalluarput suliffeqalernissaminnullu piareersimallutik - suliffissaminnik nassaarsinnaassagunik, Doris Jakobsen ullumi taama allappoq.

Sulisunit 145-iusunit pingasuinnaat kalaaliupput
Kalaallillu ingerlatseqatigiiffiisa ilaata Royal Arctic Logisticip, 145-t missaannik sulisoqartup, kalaallinik pingasuinnarnik sulisoqarnera ajuallaatigisimavaa.

- Tamanna pitsaanerusinnaagunaraluarpoq, Doris Jakobsen isumaqarpoq.

- Royal Arctic Logisticip Royal Greenlandillu maani illoqarfimmi suliffeqarfiini sulisut aalajangersimasumik amerlassusillit kalaalliunissaat anguniarneqartariaqaraluarpoq, kiisalu aamma ilinniartitaanikkut suliffimmilluunniit sungiusarfeqartitsinikkut suliffeqarfiit CSR-imik suliniuteqarnerannut ilaatinneqarluni, Doris Jakobsen taama siunnersuuteqarpoq.

- Isumaqarpunga taama isiorneq ataqqinartumik iliornerussasoq aammalu Danmarkimi naalakkersuisut suliniutaannut tulluarlunilu tikilluaqqusinerussasoq. Taamaasilluni kalaallit Danmarkimi sulliveqarfinnut pulaniarnerini suliffiutitsinnit pisariaqartumik aqqutissiuunneqarsinnaapput, tassami nakkaannarnermit pitsaaneruvoq. Taama isiornitsigut Danmarkimi suliffiutigut ilinniarfittut atorsinnaavagut, iluatsillugulu siunissami ilinniarsimasunik sulisoralugillu pisariaqartilissagassatsinnillu piareersarfiusinnaapput, Folketingimut ilaasortaq Siumumeersoq taama isumaqarpoq.