RAL-ip Pitufimmut angallassisussanik suliariumannittussarsiorneq aarlerissutiginngilaa
![](/sites/default/files/styles/image_934x467/public/article_images/ral_container_branding_greenland._630_2.jpg?itok=5PtBj9h5)
Sakkutooqarfimmut assartuussinerit tamarmik ullumikkut Royal Arctic Linemit isumagineqartarput, tassanilu unammillerneqarnissaq aarlerinartinneqanngilaq.
Sakkutuut timmisartortartut Amerikamiut Pitufimmiit Pituffimmullu imaatigut assartuinermi piginnaasat uppernarsarnissaannut periarfissiisimapput.
Tamanna isumaqarpoq, suliffeqarfiit imaatigut kiffartuusserusuttut marsip arferngata tungaanut assartuusserusullutik kissaateqarsinnaasut. Suliffeqarfinnullu kiffartuusserusuttunut amerikamiut sakkutuui isumaqatigiissuteqarnissamut ammaassipput.
Aamma atuaruk KNR-ip allagaatinik takunnikkumanera danskit ministereqarfiata akiumaataaraa
Royal Arctic Linemili, maanna Danmarkip Pituffiullu akornanni angallannermik kiffartuussisuusup, unammillerneqarnissaq aarlerissutiginngikkaa attaveqaqatigiinnermut pisortaq, Jakob Strøm, oqaluttuarpoq.
- Nutaamik suliariumannittussarsiortoqassappat periaffissagut pitsaasutut isigivagut. Soorunami uatsinniit akikinnerusunik neqerooruteqartoqarsinnaavoq. Isumaqarpungali suliassaq una pillugu ima nallunngisaqartigisugut akitigullu ima pitsaatigisugut suliariumanittussarsiortoqassappat piareersimalluta.
Royal Arctic Line Pituffimmik 1990-ikkunnili pilersuisuusimavoq, siornalu septembarimi ukiunut sisamanut isumaqatigiissummik sivitsuisimalluni - kisianni ukiup ataatsip qanngiunnerani suliffeqarfiit allat neqerooruteqarsinnaanerat ammatinneqarluni.
Aamma atuaruk Professori: Pituffimmut suliaq tunngasoq ajugaanavianngilaq
Naak kiffartuussinissamik isumaqatigiissut oqallisaagaluaqisoq RAL-imi suliariumannittussarsioriataarsinnaanerup eqqortumik ingerlanneqarnissaa tatigineqarpoq.
- Kalaallit Nunaat sinnerlugu malinnaavugut, uagulli akisussaaffipput qiviaraanni siornatigumut naleqqiullugu allannguisoqarsimanngilaq, attaveqaqatigiinnermut pisortaq Jakob Strøm KNR-imut oqarpoq.