KNR-ip allagaatinik takunnikkumanera danskit ministereqarfiata akiumaataaraa
KØBENHAVN: Kissaateqarnermit qaammatit pingasunngormata, allagaatinit 113-init takujumasanit 15-iinnaat tunniunneqarput.
KNR Pituffimmi sullissinermut isumaqatigiissut pillugu sulianut tunngasuni allagaatinik nunanut allanut ministereqarfimmut takunnikkumalluni siorna novembarip arfineq-aappaani qinnuteqarpoq. Taamaaliorpoq amerikami illersornissamut ministereqarfik suliarinnittussamut isumaqatigiissuteqareermat.
AAMMA ATUARUK Professori: Pituffimmut suliaq tunngasoq ajugaanavianngilaq
Suliaq taanna tupigusuutigineqaqaaq isornartorsiorneqarlunilu, Greenland Contractors, Namminersorlutik Oqartussanit piginneqataaffigineqartoq, ajorsarmat, piginneqatigiiffik, amerikamiunit pigineqartoq Exelis Service, isumaqatigiissusiorfigineqarluni.
Amerikamiut tassunga isumaqatigiissuteqarput, illersornissaq pillugu naak Danmarkip nunattalu USA-mik isumaqatigiissutaanni erseqqissarneqaraluartoq, Amerikamiut Pituffimmik atuinerat kalaallinut iluaqutaassasoq - ilaatigut kalaallit sullissisarnerisigut. Taamaammat alajangiisoqartinnagu susoqarsimanersoq, KNR-p paaserusuppaa.
Danskit oqartussaasuisa amerikamiut oqartussaasui suliarinnittussarsiortoqartinnagu oqaloqatigisarsimavaat?
Danskit naalagaaffiata Namminersorlutillu Oqartussat tamatumunnga tunngasumik qanoq attaveqaqatigiittarsimappat?
Taamaassimappat kikkut attaveqaqatigiittarsimappat? Ataatsimiinnernilu suut oqaloqatigiissutigineqartarsimappat?
Taamalu aamma danskit kalaallillu aammalu amerikamiut oqartussaasuisa akornanni Pituffiup atorneqarneranut tunngatillugu sunik allanik isumaqatigiissusiorsimanerpat?
Kisianni apeqqutit tamakkua KNR-ip suli akissutissarsinngilai.
AAMMA ATUARUK Thorning Pituffik pillugu isumasiorniarlugu aggersaraat
Ullumi takunnikkumanermit qaammatit pingasungajalluinnaat qaangiutereersut, nunanut allanut tunngasunut ministereqarfiup allagaatit takujumasat suli tamakkerlugit tunniutinngilai.
Allagaatinit takujumasanit 113-iusunit 15-iinnaat tunniunneqarput.
Ministereqarfimmit tunngavilersuutigaat, suliaq angisuujummat, taavalu aamma ministereqarfiup allagaatinik tunniussinnginnermini, amerikamiut oqartussaasuinit suliffeqarfimmiillu namminersortumit akissutisinissani utaqqeqqaarmagu. Kiisalu nunanut allanut tunngasunut ministereqarfiup danskillu nalagaaffiata eqqartuussissuserisuata allaqatigiissutaat tunniutsinnagit misissoqqaagaassaasut.
AAMMA ATUARUK Olsvigip Lidegaardip Naalakkersuisullu Pituffik pillugu akissuteqarnissaat ujartorpaa
Allagaatit takujumasat tunniunneqarnissaat, ministereqarfimmit kingusinnerpaamik februaarip 23-ani pissasoq maanna neriorsuutigineqarpoq.
