ASSIT Rakettip sinnikuisa Baffinbugtimut nakkarnerat

Russit rakettimik avataarsualiartaammik Moskvap avannaani kilometerinik 800-nik ungasitsigisumit aallartitaata sinnikui, Baffin Bugtimi Pituffimmi sakkutooqarfiup ungasinngisaanut nakkarsimapput.

Allattoq Karsten Sommer

februaarip 18-at 2016 06:23

Nutserisoq Simon Uldum -

Ekstrabladet taama allaaserisaqarpoq.

Rakettip avataarsualiartaatip aallartinneqannginnerani danskit islandimiullu silaannakkut angallannermut oqartussaasuisa Nunatta Canadallu akornanni timmisartumik ingerlasussanut mianersoqqussutigaat raketsimik aallartitsisoqarnerata kinguninnguani Baffin Bugtimi sumiiffinni annertujaami silaannarmit nakkaasoqarsinnaasoq.

Taamatullimi pisoqarpoq.

Aallartitsisoqareersoq minutsialunnguit ingerlareermata, nal.14.15, rakettip avataarsualiartaatip aallartitsissutaata sinnikui Baffin Bugtimut Pituffimmi sakkutooqarfiup ungasinngisaanut nakkarput.

Danskeq Stefan Rosenlund, Pituffimmi sakkutooqarfimmi ulluinnarni sulisuusoq nakkaasoqarfimmit kilometerit 100-t missaannik ungasitsigisumi nikorfavoq.

Stefan Rosenlundip suleqataatalu nakkaasoqarsinnaanera tusarsimavaat, Nordbjergimullu, sakkutooqarfimmit minutsinik qulinik ingerlaarluni orninneqarsinnaasumut ingerlapput rakettip nunarsuup silaannartaatigut ingerlaarnera malinnaavigiartorlugu.

Aamma atuaruk Russit rakettiannit seqummakut Qaanaap avataatungaani nakkarsinnaapput

- Assiliumallugu assiliissutiga nassarpara. Pisoq sukkaqaaq ullorissallu anaanut assersuunneqarsinnaalluni, Stefan Rosenlund, takusaminik assiliisoq taama nassuiaavoq.

- Avannaata-kitaatungaanut alapernaapparput, ilimagaaralu uatsinnit kilometerit 80-it 100-llu akornanni ungasitsigisumi nakkarsimassasoq, Stefan Rosenlund Ekstrabladetimut taama oqarpoq.

Rakettip sinnikui naatsorsuutigineqartutut Baffin bugtimut nakkarput tamatumunngalu atatillugu ajoqusertoqarsimaneranik nalunaaruteqanngilaq.