Russit rakettiannit seqummakut Qaanaap avataatungaani nakkarsinnaapput
Timmisartut russit rakettit igeriunnikuusaasa seqummakuinik piffissamimi sivikitsumi eqqorneqarsinnaapput.
Danskit islandimiullu timmisartukkut angallannermut qullersaqarfii timmisartortartunut notam-imik taaneqartartumik mianersoqqusisuupput. Notam tassaalluni "NOtice Tio AirMen" tassa silaannarmiittunut nalunaarut, Angallannermut ministeriaqarfiup ataani Naviairimi tusagassiutinut attaveqartartoq, Jan Eliassen, taama nalunaarpoq.
Marlunngornermut pingasunngornermullu mianersoqqusisoqarpoq
Mianersoqqusineq ullumi marlunngornermi aqagulu pingasunngornermi nalunaaqutaq 14:40-mit nalunaaqutaq 16:10-mut ullut taakku marluk atuutissasoq, Jan Eliassenip Naviairimeersup nalunaarutigaa.
- Taamaaliorpugut Danmarkimimi angallanneq pillugu qullersaqarfimmit nalunaarfineqarsimagatta, russit arlaannik rakettimik aallartitsisimasut taamaalisoqarneranillu seqummakunik nakkartoqarsinnaasoq. Taakkulu timmisartornermi akornutaasinnaammata mianersoqqusisussaavugut, Naviairimit tusagassiutinut nalunaartartoq Jan Eliassen oqarpoq.
Naviair silaannakkut angallannermik ataqatigiissaarisuuvoq.
- Seqummakunik nakkartoqarsinnaasoq timmisartut nalunnginniassammassuk, taamaammallu avaqqullugu timmniasammata, Jan Eliassen oqarpoq.
Qaanaap avannaata kippasissuani nakkartoqarsinnaavoq
Canadap Nunattalu akornata silaannartaa rakettip seqummakuinik nakkarfigineqarsinnaasutut ilimagineqarpoq.
- Silaannaq Qaanaap avannata kippasissuaniittoq timmisartorfigineqarpiarneq ajorpoq, taamaattumillu timmisartut ikittuinnaat timmisartorfissaraluartik allanngortittariaqassagaat, Jan Eliassen KNR-imut oqarpoq.
Jan Eliassenip seqummakut nakkarsinnaasut qanoq angitiginersut naluai, taavalu aalisartut piniartullu tamatuma nalaaniissinnaasut mianersoqquneqarnissaat pisariaqassanersoq aamma nalullugu.
