ASSIT: Qulliit atorlugit saqqummersitsineq ikinnerussuteqartunut sammitinneqartoq
Københavnimimi ”Copenhagen Light Festival” februaarip qaammataata annersaani pissaaq - illorsuillu ilisarisimaneqarnerpaat ilaat, soorlu Børsen aamma Christiansborg, qullilersorlugit allatut takusassiarineqassapput.
Eqqumiitsuliortut inuusuttut suleqatigiit Danmarkimit nunatsinniillu peqataaffigineqartut, SIIKU, Christianshavns Torvimi nunatsinnut eqqaassutissaq ulluni makkunani allanngortillugu suliaqarfigaat.
Kalaallimik piniartumik inuusaliaq illoqannginnersamiittoq, Københavnimi kalaallit atugarliuuteqartut ilaannit katersuuffittut atorneqarpoq. Taanna qullilersorlugu qaamasumik sinaakkusersugaavoq piniartumillu inuusaliaq ammallorissumik sinaakkusigaalluni.
Nukissaqartutut tulluusimaarutissaqartutullu misigititserusuttut
Qulliit atorlugit takusassiarineqartoq taaguuteqartinneqarpoq Inuit Nutaat - eqqumiitsuliortunillu imminnut SIIKU-mik taagortunit - Rasmus Nielsenimit David H. Péronardimillu suliarineqarluni.
Svend Rathsacksip nunatsinnut eqqaassutissaliaa Christianshavns Torvimiittoq toqqarpaat atugarliuuteqartut illoqannginnersamiittartut isigineqarnerat allanngortikkumallugu kiisalu aamma nukissaqartutut tulluusimaarutissaqartutullu misigitikkumallugit, eqqumiitsuliortut tusagassiorfinnut nalunaarutiminni taama allapput.
Inuit Nutaat SIIKU-p Kalaallit Illuutaat Københavnimiittoq Nordatlantens Bryggelu suleqatigalugit, aningaasaateqarfinnillu arlalinnit tapiiffigineqarluni pilersinneqarpoq.
Eqqumiitsuliortut suliaat nittartakkami siiku.dk-mi takuneqarsinnaapput.