Qulingiluanik ukiulik inuup timaata ilaanik nassaareernermini pisariaqartitaminik ikiorneqanngitsoq
Ilulissani ilaqutariit illuanni oqaloqatigineqarneq sivikitsoq.
Tassa taannaavoq niviarsiaqqap siorna arfineq-pingasunik ukiullip, Ilulissani eqqakkanik ikuallaavimmi inuup niuanik takunneqqaartup, ilaqutaasalu ikiorneqarnissaannik neqeroorut.
Ilulissani toqutsillunilu agguisoqarnera
28-nik ukiulik, Tittus Hansen, inummik toqutsisutut inuullu toqunikup timaanik assuarnartumik ikkatilliisimasutut eqqartuunneqarpoq.
Taanna killiligaanngitsumik paarisassanngortinneqarpoq.
Toqutaasumut qanigisaasunut katillugit 300.000 koruuninik taarsissaaq.
Niviarsiaqqap arnaa, 45-nik ukiulik, Dina Dora Marcussen taama oqaluttuarpoq.
- Pisortanit ikiorneqarnissamik allanik neqeroorfigineqanngilagut. Tamanna sumiginnaanerusoq isumaqarpunga, taanna oqarpoq.
AAMMA ATUARUK Toqunikumik agguineq pillugu suliaq naammassivoq - immiussalli saqqummiunneqarnera misissorneqassaaq
Dina Dora Marcussen paninilu, Dorthia, siorna Ilulissani eqqakaknik ikuallaaviliarput. Niviarsiaqqap ataataa taamani suliffigsaanut alakkarpaat.
Pulaarneralli amiilaarnartumik misigisaqarfiuvoq. Niviarsiaqqap ullumi qulingiluanik ukiullip eqqakkanik ikuallaavimmi eqqakkanik qinaasinermini inuup niua takuaa. Ullualuillu qaangiuttut niaqoq aamma nassaarineqarpoq. Kinaassusersineqarporlu, tassa 24-nik ukiulik, Maassannguaq Dalager.
Nassaarnermut uppernarsaat
Dina Dora Marcussenip oqaluttuarnera naapertorlugu, eqqanik ikuallaavimmi aqutsisoq taannaavoq ilaqutariit Ilulissani Ilaqutariit illuanni nalaatsinerlunnermik ikiorneqarnissaannik sulissutiginnittoq. Oqaloqatigiinnerli taanna iluaqutigisimanngilaat.
Inuup timaata ilai eqqaaveqarfinnut iginneqarput. Assi: Christine Hyldal
- Ippassaammat pisoq aniatinniaraluarakku oqarfigineqarpunga taanna iperarlugu ullumikkumiilaarta, ullumikkorpiaq. Nipagiinnarnikuuvunga, oqaqqinnagalu. Taava meerartakka nipangeqqaannarput. Namminneq oqalorusaarput taakku, taanna oqarpoq.
Politiit Dorthia niumik nassaarneranut uppernarsaammik tunivaat, taassumali kingorna susoqaqqinngitsoq, Dina Dora Marcussen oqarpoq.
Taanna aamma oqarpoq panini pisariaqartitaminik pisortanit suli ikiorneqanngitsoq, Tamannalu ilaqutariinnut maanna kingunerluttalertoq.
- Paniga nilliarujuttalerpoq naterlu tukkartalerlugu, Tarnip pissusaanik immikkut ilinniarsimasumit ikiorneqarnissaa kissaatigaara, Dina Dora Marcussen oqarpoq.
Borgmesterimit ikiorneqannginneq
Dorthiap ikiorneqapallannissaa iluatsinngimmat, Dina Dora Marcussen, nassaareernerup kingorna sapaatit akunneri marluk qaangiuttut Avannaata Kommunianukarpoq. Tassani toqqaannartumik borgmesterimut, Palle Jermiassenimukarpoq. Ikioqqugaluarporlu.
- Borgmesterip saannikuuaanga inunnik ataasiakkaanik ikiuussinnaanani. Uangaalluni artornarpoq, taanna oqarpoq.
AAMMA ATUARUK Toqutsineq pillugu eqqartuussineq: Ilisimannittup unnerluutigineqartoq pinerliffigineqartorlu imeqatigisimagai
Dina Dora Marcussen ullumi nukissaaleqisaqaaq. Panimi inuup niuanik eqqakkanik ikuallaavimmi nassaartup ikiorneqapallannikuunnginnera kamaatigaa. Ikiorneqarnissaalu angutserlugu nammineq saaffiginnikkusukkunnaarpoq.
- Kamaammeqqanikuunermut alarnikuuakka. Saaffiginnikkumajunnaarnikuuvunga. Qisuariaateqanngimmata. Nukissaaleqilertarpunga. Kimut saaffiginnissuunga? Siunnersorneqarnikuunngilanga, taanna oqarpoq.
Avannaata Kommuniata borgmesteriata isornartorsiutit akiumanngilai. Inunnut ataasiakkaanut tunngasunik suliaqaqqusaananilu oqaaseqarsinnaanani taanna oqarpoq. Taamali saaffigineqaraagami ataatsimut isigalugu qanoq iliortarnerminik nassuiaavoq.
- Innersuuttarpagut immikkoortortaqarfimmi pineqartumi oqaloqatissaannut, Palle Jerimiassen oqarpoq.
Pisoq naatsumik:
- Ilulissani eqqakkat ikuallatassat akornanni inuup niuanik siorna arfininngornermi oktobarip aappaani nassaartoqarpoq.
- Inuup niaqua 58-eriarlugu kapineqarsimasoq ataasinngornermi oktobarip ulluisa sisamaani nassaarineqarpoq. Kapuineq toqunnginnerata toqoreerneratalu kingorna tamanna pisimasoq misissuinerup kingusinnerusukkut takutippaa.
- Nassaartoqarnera kingorna ullut ingerlaneranni inuup timaata ilaanik allanik aamma nassaartoqarpoq, taakkuli ilaatigut ikuallassimapput.
- Unnerluutigineqartoq najukkamini siorna oktobarip ulluisa arfineq-pingajuanni tallimanngornermi tigusarineqarpoq. Taannalu taamanili tigummigallarneqalerluni manna pinerluuteqarsimasunut Nuummi inissiisarfimmiippoq.
Pisoqarfik. Assi: Christine Hyldal
