Eqqakkat ulissualersorneqartut: Qulimiguulimmik Innaarsuliartoqaqqissinnaalertoq

Ullut 22-t  - Innaarsunni qulimiguulinnut mittarfeeraq tassa taama sivisutigusumik matoqqavoq. 

Qulimiguulimmilli maanna Innaarsuliartoqaqqissinnaalerlunilu tassannga aallartoqaqqissinnaalerpoq. 

Mittarfeqarfiit ingerlatsinermi pisortaat, Niels Grosen, taama ilisimatitsivoq. 

Qulimiguulinnut mittarfeeqqap eqqaani eqqakkat silaannakkut angallassinermi isumannaallisaaniarluni ulissualersorneqartut, taanna oqarpoq. Puussiammi plastikkit eqqakkallu allat qulimiguullip qulimiguuanut aquatalu kaavittuanut millugunneqarsinnaapput – taamaammallu tamaani qulimiguulinnut mittarfeeraq matoqqagallarpoq.

Soorliuna eqqakkat ulissualersorniarneqarnerat qaammammik ilivitsungajammik sivisussuseqartoq?

- Apeqqut taanna akiuminaappoq, ingerlatsinermi pisortaq naatsumik akivoq. 

Kommuni eqqakkat ulissualersornissaannut akisussaasuullunilu ulissualersortitsisuusoq, taanna aamma erseqqissaavoq.

Qimmit pitutaanngitsut

Sullitami suleqatigisamilu pitsaanerpaanik atugaqarnissaannik qularnaarinissaq akisussaaffigigitsik, Mittarfeqarfiit nittartakkaminni allapput. Taamaakkaluartoq allatut iliorsinnaasimanatik, Mittarfeqarfiit pisortaat Niels Grosen isumaqarpoq.

- Silaannakkut angallassinermi isumannaallisaanissaq qularnaagassaraarput. Tamanna suliassatsinni sallersaavoq. Ajornartorsiorluta ataasiaannarnata erseqqissaatigaarput. Kommunip suleqatigisattalu allat tamanna ukiuni arlalinni ilisimavaat.

Tusaajumaneqanngitsusi isumaqarpit?

- Naagga, taama oqarusunngilanga. Ajornartorsiut tamanna aaqqittariaqartoq kommunip miserratiginngikkaa isumaqarpunga. 

Ajuusaarnaqisoq

Eqqakkat qanoq iliuuseqarfigineqarput. Ulissualersorneqarneralli naammanngitsoq, ingerlatsinermi pisortaq isumaqarpoq. 

- Kommuni eqqakkat kingusinnerusukkut ulorianartorsiutaaleqqunagit allamukaanneqarnissaannut suli akisussaasuuvoq. Qimmimmi pitutaanngitsut allalluunniit eqqakkanut qanillattoriaannaapput – taamaattoqassappallu ajornartorsiutaaleqqissapput, Niels Grosen oqarpoq.  

Mittarfeqarfiit Innaarsunni qulimiguulinnut mittarfeeqqammik qaammammi ilivitsungajammi matoqqagallartitsinera naammaginanngitsoq, taanna isumaqarpoq.

- Pinngitsoorneqarsimasimannaagaluarpoq. Isumatusaartumik eqqagassalerinikkut allamiluunniit eqqaavissuaqalernikkut. Qulimiguulinnut mittarfeeqqap taama sivisutigisumik matugallartariaqarsimagatsigu ajuusaarnaqaaq, ajoraluartumilli pisariaqavissimalluni. 

Eqqagassalerinermik eqqagassalereqatigiiiffimmillu ESAN-imi suleqateqarnissamik pilersaarutit kommunalbestyrelsenimit akuerineqareersut, Avannaata Kommuniata borgmesteria Palle Jerimiassen KNR-imut siusinnerusukkut oqarpoq.

Kommuni ikuallaagallarsinnaanermut akuersissutitaarnissaa aamma neriuutigigitsik, taanna aamma oqarpoq.