COP21 Qujaukitsoq:Piumasarisavut aalajangiusimavavut
Nunanut allanut naalakkersuisoq Vittus Qujaukitsoq Naalagaaffiit Peqatigiit silap pissusaat pillugit ataatsimeersuartitsineranni, COP-21-imi, peqataavoq.
Nunatsinniillu piumasarineqartut arlallit piviusunngortinneqanngippata silap pissusaa pillugu isumaqatigiissutigineqartussami Nunatsinnit atsiortoqarnavianngilaq.
- Taamatut paasisariaqarunarpoq, Vittus Qujaukitsoq KNR-imut oqarpoq, ilanngulluguli oqarluni isumaqatigiissutissamut suli akuersisinnaanissamut periarfissaqartoq.
Ineriartornissamik piumasaqarneq
Nunatsinniilli isumaqatigiissutigineqartussaq akuerineqassappat Nunatsinnit piumasarineqartut akuerineqartariaqartut, Vittus Qujaukitsoq oqarpoq.
- Isumaqarpunga Nunatta siuariartornissaanut ineriartornissaanullu naligiissumik periarfissaqartitaanissaanut piumasaqarneq tupinnartuunngitsoq, Vittus Qujaukitsoq oqarpoq.
Gassinik kissatsitsiartortunik annikillisaanissamut isumaqatigiissummut pituttuisumut taamaalilluni akerliuvoq.
Aamma atuaruk Silap pissusaa pillugu ataatsimeersuarnermi ineriartortitsineq Vittusip anguniarpaa
Nunatsinnimi inuussutissarsiornerup siuarsarnissaanut gassi kissatsitsiartortoq aniartitaq allisinneqartariaqarsinnaasoq, Vittus Qujaukitsoq isumaqarpoq.
- Taamaattumik periarfissatta mattunneqannginnissaat, silap pissusaa pillugu isumaqatigiissuteqarnissamut qulakkiissallugu pingaaruteqarpoq, nunanut allanut naalakkersuisoq oqarpoq.
Danskit isumaqatiginninniartut
Nunarput Savalimmiullu danskit sinniisii peqatigalugit ataatsimeersuarnermut peqataapput.
Taamaattumik danskit naalakkersuisugut sinnerlugit isumaqatiginninniarput.
Isumaqatiginninniarnerillu maannatut ingerlaannassappata Vittus Qujaukitsup piumasarisai isumaqatigiissummi ilaatinneqarnavianngillat.
- Nunatsinniit immikkoortut soqutigisatik malinnaaffigisavut assigiinngitsut, isumaqatigiissuteqarnissamut missingiummi ajoraluartumik maannakkumut ersernerluttut tassaapput ukiuni isumaqatigiiffiusussani gassit silaannarmik kissatsitsiartortitsisut qanoq annertutigisumik annikillisarneqarnissaannut anguniagaq ersernerluppoq, Qujaukitsoq oqarpoq.
Annikillisaanissaq ilungersuutigineqartoq
Naalakkersuisullu isumaqatigiissummut pituttuisumut atsioqataanianngikkaluarunilluunniit, gassinik kissatsitsiartortunik annikillisaanissaq Nunatsinnit ilungersuutigineqartoq, Vittus Qujaukitsoq erseqqissaavoq.
- Akerlianik Naalakkersuisuniit suliniutigaarput, nukimmik atuinitsinni mingutsitsinngitsunik nukiliuutinik atuinitta annertusaaffigineqarnissaat taanna attaveqaatitigut ineriartortitsinissamut sinaakkutissatut isumaqatigiissuteqarnitsinni ilaatigut ammaassiffigaarput erngup nukinga atorlugu nukiliutit ullumikkormiit suli annerusumik ineriartortinneqarnissaat, Vittus Qujaukitsoq oqarpoq.
Aamma atuaruk COP21-mi Issittormiut ataatsimoorput
Gassit kissatsitsiartortut annikillisarnissaanut Naalakkersuisut taama ilungersortigigunik isumaqatigiissummut angusaqarluarniartumut sooq atsioqataanianngitsut Vittus Qujaukitsoq aperigatsigu ima akivoq.
- Siunissami nunatta siuariartornissaanut ineriartornissaanullu killiliisinnaasunik piumasaqaatitaqartunik pisussaaffilerneqarnissarput taanna Naalakkersuisuniit mianerilluinnarparput. Tassami Nunarput ineriartortinneqassaaq aamma aporfissalersuisunik isumaqatigiissutini toqqammaveqarluni Nunarput inerisarneqarsinnaanngimmat ineriartornissamut aporfissaqatsumik taanna siuariartornissarput qulakkeerniagassaraarput, Vittus Qujaukitsoq oqarpoq.
