Qujaukitsoq tigusarinninnerit pillugit angalaniarunnaartoq
Vittus Qujaukitsoq europamiut nunanut allanut ministerit arlallit peqatigalugt, Norgemi Arctic Frontierimi ataatsimeersuaqataasussaagaluarluni angalanissani taamaatiinnaraa, Nunanut allanut tunngasunut pisortaqarfik KNR-imut paasissutissiivoq.
Kalaallit kilisaataanni Polar Nanormi inuttat marluk islandimiup niviarsissap 20-inik ukiullip tammarneranut atatillugu tigusarineqarput ullunilu 14-ini tigummigallagassanngortinneqarlutik. Tamassuma saniatigut Polar Nanormi politiit misissuineranni hashi annertooq nassaarineqarmat inuttaq ataaseq aamma tigusarineqarpoq.
AAMMA ATUARUK Pisoq tamarmik nuanniilliuutigaat
Nunanut allanut tunngasunut pisortaqarfik naapertorlugu Polar Nanormi inuttanit 28-iusunit 19-it kalaaliupput, inuttanullu ilaqutaasut pisumut tunngatillugu ernumassuteqarlutik Namminersorlutik Oqartussanut saaffiginnittut amerlapput.
Tigusarineqartut ikiorneqarnissaminnut pisinnaatitaapput
Islandimiut oqartussaasui, danskit Islandimi aallartitaat kiisalu Polar Seafood kilisaammik piginnittuusoq qanimut suleqatigineqartut, nunanut allanut tunngasunut pisortaqarfik KNR-imut paasissutissiivoq.
AAMMA ATUARUK Hashimik nassaartoqarmat tigusarineqartut sisamaalersut
Tigummigallarneqartut nunaminnit nunanut allanut tunngasuni atorfilittamik uanilu Islandimi danskit aallartitaqarfianeersumik naapitaqarnissartik oqalutseqartinneqarnissartillu piginnaatitaaffigigaat, nunanut allanut tunngasunut pisortaqarfik paasissutissiivoq. Kalaallinut takunnittuusinnaasunut killisiorneqariasaarsinnaasunut tamanna aamma atuuppoq.
Ikiorsiissutit tamakku tigusarineqartunut inuttanullu tigusarineqanngitsunut Nunanut allanut tunngasunut pisortaqarfiup danskit allartitaat suleqatigalugu tunniunniarpaat.
AAMMA ATUARUK Polar Nanumi inuttat marluk politiinit tigusarineqarput
Islandimut tunngassuteqartut pillugit ernumassuteqaraanni Islandimilu pisunut attuumassuteqartunut ilaqutaagaanni, maanna nunanut allanut tunngasunut pisortaqarfimmi oqarasuaatinut sianertoqarsinnaavoq.
Tassa kalaallimik oqaloqateqarumagaanni oqarasuaammut 55 33 28-imut sianertoqarsinnaavoq. Tassa kalaallisut oqarasuaat 55 33 28.
Qallunaatullu oqaloqateqarusuttut 55 33 31-imut sianersinnaallutik. Tassa oqarasuaat 55 33 31. Attavissat ulloq unnuarlu ammapput, pisariaqartitsisoqarnerani ammatinneqaannassapput.
