Kilisaatinut pisortaq: Pisoq tamarmik nuanniilliuutigaat
Arnap 20-nik ukiullip tammarneranut pingasut tigusarineqarput, kilisaammilu hashimik nassaartoqarmat inuttaasoq ataaseq aamma tigusarineqarluni.
Kilisaatip inuttaai sinneruttut 24-it Reykjavikimi hotelimut inissinneqarsimapput nikkallunganarnerali malunnaqisoq, kilisaatinut pisortaq Jørgen Fossheim oqaluttuarpoq.
- Soorunami assut ajorput. Tamanna pillugu tamatta ajorpugut. Maani hotelimi tamaasa ilagaagut, Fossheim oqarpoq. Oqaluttuarporlu kalaallimik oqalutseqarlutik tarnip pissusiinillu ilisimasalik Røde Korsimeersoq peqatigalugu inuttat pisimasut eqqartorpaat misigissutsillu oqaasertalersorlugit.
- Paatsiveerusimaarneqarlunilu pakatsineqarpoq, politiiniimmi kilisaammiiginnarnissamik kalerrinneqarluni soorunami arlaannatsinnulluunniit nuanninngilaq.
AAMMA ATUARUK Hashimik nassaartoqarmat tigusarineqartut sisamaalersut
Politiit misissuineranni inuttaasut niutinneqarsimapput, taamaaliortoqarneranilu hashi annertooq nassaarineqarpoq.
- Aap, anngiortumik eqqussisoqarpoq.
Polar Seafoodip tamanna assut quarsaarutigaa, ukiorpassuarnimi imigassaq hashilu kilisaatini inerteqqutaalluinnarsimapput.
- Assorsuaq quarsaaqqavugut taama hashimik annertutigisumik nassaartoqarmat.
Politiit kilisaammik misissuinerat ulloq naappat naammassineqassaaq, angallallu pisarnermisut ingerlaqqilissaaq.
- Angerlarusuttut angerlarsinnaapput, aalisariaqqittariaqarattali angerlartitsinngilagut, Fossheim oqarpoq.