Niisa Trawlip inuttani kalaallit Islandimiit angerlartikkai
Tallimanngornermi nal. 10.30 nutarterneqarpoq: Niisa Trawlimik piginnittup, Svend Christensenip, KNR-imut sisamanngormat oqaatigaa kilisaammi Regina C-mi inuttat, arnap 20-nik ukiullip periarfeerunneqarnerata kingorna, Reykjavikkimiinnertik toqqissisimanartinnginnamikku sisamanngornermi unnukkut angerlartinneqassasut. Taamatulli nassuiaateqarnini maanna allanngortippaa.
Kilisaammi Regina C-mi inuttat arfinillit Islandimiit sisamanngornermi angerlartinneqartut, umiarsuaateqarfiup piginnittuata, Svend Christensenip oqaatigaa.
Umiarsuaatileqatigiiffimmi piginnittup oqaluttuaraa kilisaammi Polar Nanoq-mi inuttat pingasut pingasunngornermi tigusarineqareerneranit nammineq inuttatik illoqarfimmi assigiinngitsunik iliuuseqarfigineqarsimasut.
- Maani illoqarfimmi tikilluaqqusaanngitsutut misigisimapput, Svend Christensen oqarpoq.
Ilanngullugulu oqaluttuaraa, inuttat ilaat mamartunik aviisinillu pisiniartillutik pisiniartitsisumit akuerineqaratik pisiniarfimmit anisitaasimasut.
- Kalaallit tamarmik taamaattuusorineqarput tamannalu taakkununga tuttussaanngilaq, Svend Christensen oqarpoq, oqaatigalugulu Regina C-p naalagaa Reykjavikkimiiginnassasoq.
Polar Nanoq-mi Polar Seafoodimit pigineqartumi inuttat marluk sisamanngornermi ualikkut sapaatip akunnerini marlunni tigummigallarneqartussanngorput. Politiit inuit taakku suliamut tunngatillugu pasivaat oqaatigerusunngilaalli sooq pasinerlugit. Kilisaammi inuttaq alla ataaseq aamma tigusarineqarpoq sisamanngornimili ullup qeqqata nalaani suli eqqartuunneqarsimanngilaq.
