Oqaaseqartartoq nutaaq: Qivioq Løvstrøm innarluutillit oqaaseqartartuattut toqqarneqartoq

Inuit Innarluutillit pillugit pisinnaatitaaffinnik pissutsinillu pitsaasunik qulakkeerinissamut tunngatillugu 2025-mit nutaamik oqaaseqartartoqalissaaq.

Naalakkersuisut Qivioq Løvstrøm Inuit Innarluutillit pillugit Oqaaseqartartutut nutaatut toqqarpaat. Naalakkersuisut tusagassiuutinut nalunaarummi paasissutissiipput.

32-nik ukiulik Inuit Pisinnaatitaaffii pillugit Siunnersusioqatigiinni siulittaasooreerluni oqaaseqartartunngussaaq.

Taassuma Anja Hynne Nielsen Inuit Innarluutillit 2021-mili Oqaaseqartartorisimasaat kingoraassavaa.

- Qivioq ingerlatitseqqittarnermik ilisimasaqarluarmat, inuit pisinnaatitaaffiinut tunngasunik sulinermigut misilittagaqarmat kiisalu suleqateqallaqqillunilu aqutsisuulluarsinnaammat, inunnut innarluutilinnut inuiaqatigiinnullu tamanut nalimik annertuumik tunniussassaqarpoq, meeqqanut, inuusuttunut, ilinniartitaanermut, kultureqarnermut, timersornermut ilageeqarnermullu naalakkersuisoq, Aqqaluaq B. Egede (IA) oqarpoq.

Taassumalu Anja Hynne Nielsen Inuit Innarluutillit pillugit Oqaaseqartartuattut suliaqarneranut qujassuteqarfigaa.

Qivioq Løvstrøm nunap inoqqaavisa pisinnaatitaaffii qitiutillugit Ilisimatusarfimmi Ph.d.-nngorniartuuvoq.

Qivioq siornatigut Nunanut allanut Naalakkersuisoqarfimmi AC-fuldmægtigitut sulisimavoq, Asiamut tunngasut, Niuerneq, Silap pissusia, Inuttut pisinnaatitaaffiit  Nunallu Inoqqaavisa pisinnaatitaaffii suliassaqarfigisimallugit.

- Inuit Innarluutillit oqaaseqartartuattut atuuffik imaannaanngitsuusoq ilisimavara, tamanna maanna uanga atorfigisussanngorpara. Arnat maligassiuisut tamarmik eqqaamallugit qujamasullungalu pisinnaatitaaffigut illersorlugit suliumaarpunga, Qivioq Løvstrøm oqarpoq.

Inuit Innarluutillit Oqaaseqartartuannik ukiut pingasukkaarlugit toqqaasoqartarpoq.