Qinersinersiartortut oqaluttuarisaanermi aatsaat taamak ikitsigisut: - Inuit qasupput

Piffissami pissanganartorsiorfioqisumi, kommunimut qinersinermi naammasseqqammerluinnartumi nuanniitsumik rekortiliiffiuvoq.

Nunammi taasisinnaasuisa affaannai sinnilaarlugit marlunngormat qinersiartorput. Tassa kommunimut qinersinermi uani 52,7 procenteqqissaat taasimmata.

Tamannalu qinersinermi procenti oqaluttuarisaanermi appasinnerpaavoq. Taamaakkaluartoq qinersinerup inernerinik unnuaq malinnaasup, KNR-ip oqaaseqartartuata Erika Nielsen Baadhip tupaallaatiginngilaa.

- Inatsisartunummi qinerseqqammerpugut, inuillu avataaniit soqutiginninninnerujussuaq qatsuppaat. Inuit politikkimik, pingaartumik nunanit tamalaanit soqutiginninneq annertooq pissutigalugu qatsusseqqapput, Namminersorlutik Oqartussani allatsiusoq Ilisimatusarfimmilu Inuiaat Kulturiat Oqaluttuarisaaneranillu ilinniagalik Erika Nielsen Baadh oqarpoq.

Kommunimut qinersinerni taasinerit 2008-mili 60 procentit missiliortarpaat. Taamaalilluni kommunimut Inatsisartunullu qinersineq nalinginnaasumik appasinneruvoq.

Amerikap præsidentiata Donald Trumpip kalaallit Nunaannik aqutsilerusulluni oqaatiginnittaqattaarnerata kinguneranik, Kalaallit Nunaata nunanit tamalaanit soqutigineqarnerujussua inuiannik politikkimik qatsussititsisimasoq, Erika Nielsen Baadh naliliivoq.

Politikkimik qatsussisut

Qinersinerit imminnut taamak qanitsiginerisa, inuiaat qinersivinnut taasiartortinniarnissaat ajornakusoornerusimaqaaq.

- Qinersinerit taakkua marluk qanippallaarujussuarput, inuiaallu qinersiartoqqinnissartik kissaatiginngilluinnarpaat. Tamatuma saniatigut Inatsisartunut qinersinermi qallunaarpassuit peqataasut, kommunimulli qinersinermi malunnaatilimmik ikinneroqisut maluginiarpara, Erika Nielsen Baadh oqarpoq.

Inuusuttut qinersitikkiartornissaat ajornarsimasoq pingaarnertut maluginiarpaa.

Naak inuusuttulli qinersinermi amerlanngikkaluaqisut qineqqusaartuni takussaapput.

- Kiinnat inuusuttut nutaat amerlapput, taakkulu isumalluarnarput. Inuusuttut amerlasuut politikkimik pimoorussisut, tamatumanngalu ilisimasaqarluartut takullugit nuannaarutigaara. kinguaariit nutaat taakku isumalluarnartupilussuupput, Erika Nielsen Baadh oqarpoq.