Qinersinermut Ataatsimiititaliap aalajangiinissani kinguartippaa
Pineqartoq siusinnerpaamik ataasinngorpat ullup qeqqata siorna aalajangiiffigineqarnisaaa naatsorsuutigineqarpoq. Ataatsimiititaliap siulittaasuata Naalakkersuisut siulittaasoqarfiani pisortap Svend Hardenbergip Sermitsiaq.AG-imut oqaatigaa aalajangiinissaq pingasunngornermi ualikkut aatsaat pisinnaasoq ataatsimiititaliaq ulloq taanna pilersaarutaasut malillugit ataatsimiittussaammat.
Qinersinermut Ataatsimiititaliaq pingasunik ilaasortaqarpoq tassaallutik Naalakkersuisut Siulittaasuata allaffeqarfiani pisortaq Svend Hardenberg, KANUKOKAmi pisortaq Hans Peder Barlach Christensen aamma biskop Sofie Petersen.
Aamma atuaruk IA: Qinigassanngortittut aqqisa allattorsimaffiat piffissaq eqqorlugu tunniunneqarput
Pineqartoq pillugu piaartumik aalajangiisoqarnissaa naatsorsuutigineqarsimagaluarpoq. Kommuneqarfik Sermersuumi qinersinermut siulersuisut borgmester Asii Chemnitz Narup siulitaasuuffigisaani isumaqatigiilluni nalunaarutigineqarpoq - qinigassanngortittut allattorsimaffiata tunniunneqarnissaanut kukkusumik siunnersuisoqarsimasoq.
Tamatuma kingunerisaanik nalornissutigineqalerpoq qinigassanngortittut allattorsimaffiat piffissaq eqqorlugu tunniunneqarnersoq.
Aamma atuaruk Kukkusumik siunnersorneqarneq pisuulluni IAp qinigassanngortitani kingusinaarluni tunniuppai
Qinersinermut siulersuisut, inatsisilerituunit avataaneersunit siunnersorneqarnermi kingorna, akuersissutigaat qinigassanngortittut allattorsimaffiat piffissaq eqqorlugu tunnuinneqartoq.
Inuit Ataqatigiit Siulittaasuata Sara Olsvigip ippassaq unnukkut radioaviisimi qulakkeerlugu aalajangiusimallugulu oqaatigaa, qinigassanngortittut aqqisa allattorsimaffiat piffissaq eqqorlugu tunniuneqartoq, siusinnerusukkullu tunniunneqarsimassinnaagaluartoq, kommunemi sulisut siulittaasup atsiorneranik piumasaqarsimanngitsuuppata.
Taamaalinerani Inuit Ataqatigiit siulittaasuat Sara Olsvig qineqqusaarluni Paamiuniippoq.
- Inuit Ataqatigiit Kattufiat Kommuneqarfik Sermersuumit siunnersorneqarpoq qinigassanngortittut aqqisa akuerineqanissaanut partiip siulittaasua atsiortariaqartoq. Siunnersorneqarneq naapertorlugu kattuffiup siulittaasuata atsiornera Paamiunit qarasaasiakkut Kommuneqarfik Sermersuumut piaartumik nassiunneqartoq, Sara Olsvig oqarpoq.
- Kommuneqarfik Sermersuumit taama siunnersorneqarneq ajoraluartumik eqqunngitsuuvoq, nuannaarutigaarpullu piffissaq eqqorlugu tunniussigatta, kommunemiillu kukkusoqarsimaneranik nassuertoqarluni nalunaartoqarmat, aamma qinersinermut siulersuisut aalajangersimammata, piffissaq eqqorlugu aamma inatsisit malillugit tunniussineq akuersaarniarneqarmat, IA-mi siulittaasoq Sara Olsvig oqarpoq.
