Kukkusumik siunnersorneqarneq pisuulluni IAp qinigassanngortitani kingusinaarluni tunniuppai
Tallimanngorneq novembarip arfineq aappaanni nalunaaqutaq ullup qeqqanut novembarip 28-ani Inatsisartunut qinersinermi qinigassanngortitat allattorsimaffii tunniutereerneqartussaapput.
Partiit arfiniliusut tamarmik qineqqusaarutitik qinigassanngortitatillu saqqummiutereerpaat. Ullorli qiteqqummat Sara Olsvigip atsiugassani suli atsiorsimanngilaa.
Partiimi ilaasortat KNR-imut oqarput paasitinneqarsimallutik partiip siulittaasuata tulliata, Juliane Henningsenip qineqqusaartut aqqisa allattorsimaffiat atsiorpagu, tamanna naammattoq.
Siulittaasoq Paamiuniippoq
Sara Olsvig Paamiunukarluni aallaqqammermat atsiornera digitalimik tunniunneqartussaasimavoq, tamannali ajutoorpoq taamaattumillu partiimit qinigassanngortittut allattorsimaffiat kingusinaarluni tunniunneqarpoq.
Qinersinermi siulersuisut ualeq manna ataatsimiigiaqquneqarput, nalunaaqutarlu 17:33 tusagassiutinut nalunaarut takkuppoq, partiilu kukkusumik siunnersorneqarsimasoq oqaatigineqarpoq.
- Tamatuma kingunersiaanik qinigassanngortittut allattorsimaffiata piffissaq eqqorlugu tunniunneqarsimanera pillugu nalornisoqalerpoq.
- Kommuneqarfik Sermersuumi Qinersinermut siulersuisut isumaqatigiissut aalajangerput qinigassanngortittut allattorsimaffiat Qinersinermut ataatsimiititaliamut akuerineqartussanngorlugu ingerlateqqinneqassasoq, piffissaq eqqorlugu tunniunneqarsimanerata akuerineqarnissaa inassuteqaatilugu.
- Qinersinermut siulersuisut aalajangernissaannut atugassatut avataaniit inatsisilerituumik naliliisussamik pissarsisoqarpoq, Kommuneqarfik Sermersuumi Qinersinermut siulersuisut siulittaasuat, Asii Chemnitz Narup, allappoq.
Partiit tamarmik qinigassanngortitaasa aqqisa allattorsimaffii Qinersinermut ataatsimiititaliap akuerisassarai.
Malittarisassat ersaripput
Qinersisinnaatitaaneq qinigaasinnaanerlu pillugit Inatsisartut inatsisaat Inuit Ataqatigiinnut neriuutarutsitsisinnaagaluartoq ima allaqqavoq:
§ 13. Inatsisartunut qinersivimmi ataatsimi partii sinnerlugu qinigassanngortittut nalunaarutigineqarnerat Qinersinermik Ataatsimiititaliap partiinut nalunaarsuiffissatut allaffíssiaatigut allanneqartassaaq. Nalunaarut Inatsisartunut qinersivimmi qinersinermi siulersunut timniunneqareersimasassaaq kingusinnerpaamik qinersinissaq sapaatit akunnerinik pingasunik sioqqullugunal. 12.00.
